Vawiin khan District Veterinary & Animal Husbandry Office, Kolasib District chuan an Office kawtah Kolasib leh Thingdawla NLUP 3rd leh 4th Phase hnuaia Ar Vulh thlangtu beneficiaries 166 te hnenah NLUP tanpuina 2nd Instalment cheng 20,000 theuh an hlan a, he pawisa hi an bank account ah thunluh a ni.

NLUP 3rd leh 4th Phase-a Ar vulh thlangtu beneficiaries te hi a hmain ar in sakna tur cheng 10,000 theuh pek an lo ni tawh a, vawiina an dawn cheng 20,000 pawh hi ar in sakna atana tanpuina a ni a. Ar vulh thlangtu beneficiary pakhat zelin ar note 150 dawng tura ruahman a ni a, hei hi vawikhata pe lovin, ar 50 zel a tahtawlha pek an tum thu DVO Dr. C. Lalrintluanga chuan a sawi a. DVO chuan karleh lamah Kolasib District huam chhunga khaw danga ar vulh thlangtu NLUP beneficiaries te hnenah tanpuina sum hi pek an tum thu a sawi bawk.

NLUP 3rd leh 4th Phase hnuaiah hian Kolasib District huam chhunga Ar vulh thlangtu beneficiaries 322 an awm mek a ni.