2894/2023-2024

2023 Sahmulphah thla ni 30: Vawiin chawhnu khan District Legal Services Authority (DLSA), Kolasib, Aizawl Judicial District chuan pawi khawihna tuartute zangnadawmna (victims of crime compensation) pek chungchangah District Court Conference Hall, Kolasib-ah ṭhut khawm an buatsaih.

He ṭhut khawm hi DLSA Kolasib Chairman Pu Joel Joseph Denga, District Judge chuan a kaihruai a. Pu R. Vanlalena, Judge, Fast Track Court, Kolasib; Pi Cacy Malsawmtluangi, Chief Judicial Magistrate & Secretary, DLSA; Pi Melody Ngurthantluangi, Additional Deputy Commissioner; Pu David J. Byhnadaolai, Additional Superintendent of Police; Pi Laldinpuii, President, MHIP, Sub-Headquarters Kolasib leh Dr C. Lalmuankima, President, Consumer Union, Kolasib District te an tel.

He ṭhut khawmah hian kum 2020 aṭanga 2023 chhunga Kolasib DLSA hnuaia crime compensation dil mi 25 te chungchang ngaihtuah a ni a. Dilna lut case 25 zingah case 23 chu crime compensation pek tura remtih a ni a; case pahnih erawh chu la ngaihtuah ṭhat leh atan dah rih a ni.

Kolasib District-a crime compensation diltute zingah hian pawngsual tawk naupang kum tling lo tam berin, a bak chu puitling ramtuileilo, pawngsual tawk leh tualthahnaa tuartute an ni.

The Mizoram Victim of Crime Compensation Scheme, 2011 hnuaiah hian Court-a thubuai luta pawi khawihna tuartu leh harsatna tawk, an tuarna avanga zangnadawmna pek turte chungchang thu ngaihtuah ṭhin a ni a. A thubuai azirin zangnadawmna pek tur zat hi he Scheme hnuaiah hian bithliah ṭhin a ni.