Naupang kumkhat hnuailam te tana hri danna ruahmanna thar 'Pentavalent Vaccine Programme' Sawrkar Laipuiin a duan thar chu vawiin khan Kolasib ah a hawnna programme Park Kawn Clinic, Venglai ah neih a ni.

Pentavalent Vaccine Programme hawnna inkhawm Dr.R.K. Lalthlamuana, District Immunization Officer kaihhruaiah hian he hun hmanpuitu Pu C.T. Mawia, President Sub Hqrs. YMA, Kolasib chuan Health Department a thawkte inpekna leh thawhrimna zarah Mizo mipuite a bik takin nausen leh naupangte natna hri hlauhawm lakah an him theih nan, tlawmngai pawl te pawh an lakah beiseina lian tak kan nei a ti a. Nu leh pate chu he natna hri danna hi an fate nun leh hriselna atana a pawimawh zia hria a he vaccine hi an fate laktir ngei ngei turin a ngen. Thusawitu dang Pu Andrew V.L. Auva, Editor, Kolasib Today leh he vaccine puala thuthar thehdarhtute tana training Guwahati a neih a Mizoram aiawh a tel chuan Pentavalent Vaccine chungchang hi chipchiar takin a sawi a ni.

Pentavalent Vaccine hi vaccine pakhat niin natna chi nga - diphtheria, pertussis, tetanus, hepatitis B leh Haemophilus influenzae type B lakah venna tur a ni a. Tun hma chuan DPT (Diptheria, Pertusis leh Tetanus) vaccine leh Hepatitis B vaccine te hi a hran ve ve a pek thin a ni a, Hamophilus influenzae type B (Hib) vaccine hi tun hmain a thlawnin naupang te la pek loh niin a man pawh a sang hle a. Pentavalent Vaccine hian vaccine pakhatah heng natna hri panga laka invenna a keng tel a ni. Hib vaccine hian naupang kum 5 hnuai lamin an thihpui fo thin pneumonia, meningitis, bacteremia, epiglottitis leh septic arthritis te a veng thei tura ngaih a ni.