4069/2023-2024

2024 Vau thla ni 7: Vawiin khan Kolasib District Level Monitoring Committee (DLMC) on PMEGP (Prime Minister’s Employment Generation Programme) chu an Chairman, District Bawrhsap Pu John LT Sanga hovin Kolasib DC Conference Hall-ah an ṭhu khawm.

Chairman Pu John LT Sanga chuan mahni kutkea ding tura thiam thil bik hmanga ei zawnna leh sumdawnna bul ṭan turte tan PMEGP kal tlanga hma lakna tur loan pung tlem lak theih a ni chu a ṭangkai hle tih a sawi a. District mipuite'n chhawr ṭangkai se a duh thu sawiin, a chhawr turte'n an hriat chian a, ṭangkai taka an chhawr theih nan nodal agency - Industries, KVIB leh KVIC te chu theih tapw chhuah zel turin a chah a. Bank te pawh loan pek chhuah chungchangah ṭhahnem ngai lehzual turin a chah a ni.

He hunah hian Member Secretary, Kolasib District Commerce & Industries Officer Pu C. Lalthangkima chuan kum 2023-2024 chhunga Kolasib District chhunga PMEGP dinhmun report a pe a. DLMC chuan PMEGP hnuaia hma lakna hrang hrang thlir hovin, awlsam leh felfai zawka PMEGP dilna kalpui a nih theih dan tur te; PMEGP diltute'n PMEGP chungchang an hriat chian hmasak theih nana training buatsaih chungchang te; a diltute, nodal agency leh bank lamin harsatna an tawh ṭhin hrang hrangte leh a chin fel dan tur te an sawi ho va. Kum 2023-2024 chhunga PMEGP-a Kolasib District dinhmun ṭha tak chu lawmawm an tih thu tar langin, a rah chhuah leh hlawhtlinna ṭha zawk a awm zel theih nana hma lak zui dan tur te sawi ho a ni bawk.

Kum 2023 April ni 1 aṭanga 2024 March ni 1 thlengin Kolasib District chhungah nodal agency-te'n PMEGP loan dilna 111 dawngin, 109 chu bank lamah thawn a ni a. Dilna (project) 32 chu bank lamin loan an pe chhuak tawh a. Hemia project cost tur ₹ nuai 354.71 ruahmanah bank lam chuan loan ₹ nuai 335.81 pe chhuakin, hemia sawrkarin subsidy margin money a tum tur zat chu ₹ nuai 123.15 a ni a. Hemi hun chhung hian PMEGP diltu mi 48 chu EDP training pek an ni bawk.