Kolasib District chhung constituency pathum Tuirial, Kolasib leh Serlui –a MLA thlang tura inpuahchahna tluang takin neih zui zel a ni a. Vawiin khan heng constituency pathuma Postal Ballot tla zawng zawng khung khawmna tur Ballot Box chu party hrang hrang Candidate Agent theuhte hmuh lain enfiah a ni a, hawna chumi hnuah kalh (sealed) a ni.

Kolasib chamchilhtu Election observer panga zinga mi Narmdeshwar Lal, IAS, General Observer, Pu R. Lalramnghaka, District Election Officer leh Pi Maria CT. Zuali, Returning Officer, Serlui Constituency te chuan he hun hi an awmchilh bawk a ni. Kolasib District chhunga Inthlan duty tur polling party te chu kar leh Nov 23 khian an duty na hmun theuhvah an kal dawn a.

Hetih lai hian vawiin khan inthlan buaipuitu tur official te tan Kolasib Diakkawn YMA Hall-ah training neih chhunzawm leh a ni a. Training hi Election Officer Pi Saizikpuii leh Officer dangten an pe a ni. Vawiina training zawh hian Polling duty-a chhuak turte chu Vote thlaktir nghal an ni a, a bak chu anmahni remchan danin Postal Ballot hi tih chhunzawm a ni dawn a ni.

Attachment

  • Loading attachment...