Nimin khan Remna Ni Vawi 30-na champha chu Kolasib ah ropui tak a hman a ni. he remna ni champha lawmna inkhawm hi Diakkawn YMA Hall ah hman a ni a . He lawmna inkhawm hi Pu C. Liankunga; President Sub-Hqrs YMA in kaihruai a, Khuallian Pu H. Lalengmawia Deputy Commissioner ni in, Khual zahawm Pu C. Lalzahngova S.P. Kolasib a ni.

Khuallian Pu H. Lalengmawia chuan flag pawt pharh in thusawina hun a nei a, Mizoram in remna a neih theihna tura hma latu mual liam tawh te leh tuna la dam te chawimawi an phuzia sawiin hriat reng tlak an nih thu a sawi a. Ram buai hreawm zia sawi tur tam tak awm mahse chu lam chu kan sawi fo tur a nih tawh loh thu leh remna hi hmangaihna leh indawh tawnna tello chuan neih theih a ni lova, he khawvel a mi zawng zawng ten a kan mamawh em em chu remna a ni. Politics taka ngaihtuah chuan remna awmna hmun a piangah hmasawnna a awm a, remna mai ni lova remna in a ken tel muanna hmunah ram a changkang chak em em a ni. Khawvel ram changkang ten muanna zawngin hma an la nasa em em a. India ramah pawh zalenna kan neih chinah hmasawnna nasa tak a lo awm thei ta a ni. Kum 20 chhung rambuai kan nih lai khan State dang ten hma an lo sawn nasa em em a, hmanraw tha leh changkang tak tak an ramah an lo la lut a, hmasawnna kawngah thui tak an lo kal tawh a, kan ram pawhin remna leh muanna kan lo neih chinah hma kan sawn chho ve ta a ni. Kan ram hruaitute, an zavai khan demna tur an awm lova, mitha tak tak vek an ni a, kan hun tawn tawh a kan ram a thil thleng te kha ngaihtuah let a, rilru tihah mai lovin, he kan zalenna kan neih hi hmang tangkai ila, zalenna hnuaiha him takin kan duhzawng kan tithei tawh a ni tih hriain kan ram tan theihtawp i chhuah ang u a ti a. Remna leh muanna kum 30 kan lo neih tawh hnuah hi chuan chhung tin ten muanna hi hmang tangkai turin tan ila ang u. Kan remna leh muanna hi tichhiat theih a ni tih hi hretlang a, remna hlu tak hi i vawng nung zel ang u a ti a ni. Remna leh muanna kan vawnna kawnga ram dan awmsa tha tak tak te hi kan zawm a ngai a. Kan fanau rohlu leh kan thilhlu neih tam tak te hi ngaihngam tak leh ngaihtha taka kan kalsan ngam theihna tur chuan dan kan zawm that a midangte zah thiamna kan vawn nun loh chuan muanna kan nei thei ngai lovang a ti a. He remna vawngnung zel tur hian tute emaw mawhphurhna ah dah mai lovin kan za vaia mawhphurhna a ni tih hre turin kalkhawm te a chah.

Pu C. Lalzahngova; S.P. Kolasib pawhin thu sawiin, khawvel hmun hrang hrang ah remna ziak in; a hlawhtlin lem lo laiin keini erawh chu Pathian zarah kohhran leh a ram mipui te inlungrualna nei a remna siam a ni hi a hlawhtling a. Remna leh muanna kum 30 lai kan vawngnung thei chu lawmawm a tih thu a sawi bawk.

Pu S. Lalhmachhuana; prominent Journalist pawhin thusawiin Mizoramin a hun tawn pawimawh tak zinga mi Rambuai lai hun leh zalenna sual a nih lai atanga remna kan lo neih tak dan te ngaihnawm takin a sawi bawk a ni.

He inkhawm hi Pi Laltluangi; President MHIP Sub-Headquaters Kolasib in lawmthu sawiin hun a khar a ni.