3233/2023-2024

2024 Pawlkut thla ni 5: Vawiin khan Kolasib DC Conference Hall-ah District Deputy Commissioner (Bawrhsap) Pu John LT Sanga hovin Kolasib-a Republic Day 2024 hman dan tur rel a ni a. Sawrkar department hrang hrang official-te leh pawl hrang hrang ai awhte an tel.

Bawrhsap Pu John LT Sanga chuan kal khawmte chu kum 2024 kum thar chibai bukin, mahni ei zawnna leh hna thawhna ṭheuhvah taima taka ṭan la thar turin a chah a. Kolasib-ah Republic Day 2024 lawmna tluang taka neih a nih theih nan Kolasib District chhunga department hrang hrangte, khawtlang hruaitute leh pawl hrang hrang thawh hona leh ṭan rualna a pawimawh dawn hle a ni, a ti a. Department leh pawl hrang hrangte'n mahni mawhphurhna ṭha taka hlen chhuak ṭheuh turin a ngen a ni.

Meeting-ah hian Republic Day 2024 hman dan tur chipchiar taka duan a ni a. Kolasib-a Republic Day lawmnaah hian District Bawrhsap Pu John LT Sanga chu Khuallian tura beisei a ni a. A lawmna hun hi Kolasib Sports Stadium-ah January ni 26, 2024 (Zirtawpni) zing dar 9:00-ah buatsaih tura ruahman a ni a. Kolasib District chhunga Sub-Division tinah Sub-Divisional Officer-te nen Republic Day hi lawm tura ruahman a ni bawk.

Republic Day hlawhtling taka lawm a nih theih nan mawhphurhna hrang hrang inpek a ni a. Kolasib-a a lawmna pui berah hian armed contingent 1 (1st IR Battalion, Mualvum), un-armed contingent 6 leh school contingent 13 tel tura beisei an ni a. Hei bakah hian, a hmunhma chei dan tur te, tui leh eng chungchang te, parade contingent-te inbuatsaih dan tur te, venhimna chungchang te, sum leh pai mamawh ngaihtuah dan tur leh thil pawimawh dangte sawi ho va, ruahman a ni bawk.