3232/2023-2024

Champhai, the 5th January, 2024: Republic Day 2024 lawm dan tur relin Champhai District Level Republic Day Celebration Committee chu an Chairman, District Bawrhsap, Pu James Lalrinchhana hovin vawiin chawhma dar 11:00 khan DC Conference Hall, Keifangtlang-ah an thukhawm.

He hun kaihruaitu Bawrhsap Pu James Lalrinchhana chuan Champhai District-ah boruak muanawm tak hnuaia Krismas leh Kumthar hman a ni chu lawmawm tiin, District mipuite kumthar chibai a buk a. Department hrang hrang Head of Office-te leh tlawmngai pawl hruaitu kalkhawmte chu District hmasawnna tura theihtawp chhuah chhunzawm theuh tur leh a theihna apiangah in tawiawm tlanga hma la thin turin a chah a. Republic Day 2024 lawm tur chu India ram ni pawimawh bik anih anga theihtawp chhuaha inpuahchah a tul thu leh awmze nei taka lawm a tul thu a sawi a. District tana ni chhinchhiah tlak leh hmellana tur anih angin mawhphurhna nei hrang hrang leh chanvo nei tura ruatte chu Republic Day hlawhtling taka lawm anih theih nana thahnemngai taka thawk theuh turin a chah a ni.

Thukhawm chuan Champhai District-a Republic Day lawmna pui ber chu Chhangphut Field-ah neih nise a ti a, khuallian hi Sawrkarin a rawn ruat dawn a ni. Zing dar 6 ah sawrkar pisa, zirna leh mimal in-ahte hnam puanzar pawtpharhin zing dar 10 atangin Chhangphut Field-ah Republic Day lawmna ropui taka neih tum a ni a. Hemi hnu hian Jericho Garden, Keifangtlang-ah sawm bikte pualin VIP's At Home neih nise tih a ni bawk a. Kumin Republic Day lawmnaah hian School contingent, Unarmed contingent leh Armed contingent-te tel thei turin meeting chuan a beisei a, tul angte buaipui turin SP kaihhruai Sub-Committe din nghal a ni bawk. Sawrkar department hrang hrangte hna chanpualte siamfel nghal a ni.

He hunah hian Department hrang hrangte thawhlawm pek tur zat bithliah niin, Celebration Committee chuan phal taka tawiawm theuh turin a ngen a. Kumin Republic Day puala infiamna huaihawt tumte atanga dilna lutte sawiho niin, CDFA Football Tournament leh DC Trophy Republic Day Chess Tournament neih tum a ni a.

District Level Republic Day Celebration Committee chuan Republic Day chu India ram ni pawimawh bik anih avangin sawrkar hnathawk, zirlai leh khawtlang mipuite chu he hun hi ngaipawimawha tel theuh turin a sawm a ni.