India Republic Day vawi 61 na chu vawiin khan Kolasib Tumpui khelmual ah ropui taka lawm a ni a, Kolasib District Bawrhsap Pu R.Liankima’n Ham puanzar pawtpharhin district mipuite hnenah Republic Day thuchah a sawi a ni.

Pu R.Liankima chuan , India ram chu Danpui rinawm tak neia hmasawnna chak tak kalpuiin ram rethei tak, BPL ringawt pawh mipui hmun thuma thena hmun hnih aia tam awmna ni thin kha tunah chuan khawvela ram ropui ber te zinga mi alo nita a ni, a ti a. Mizoram chhunga hmasawnna hrang hrang lo luang lut zingah Kolasib District chu Mizoram kawtchhuaha awm a nih angin hmasawnna ropui tak tak a tawng mek reng a ni, a ti a. Retheihna umbo tura sorkarin NLUP a duanchhuah chu Kolasib District chhung bikah kumin atanga hma lak tur a nih angin a thawh khatna atan chhungkaw 1800, Constituency khatah chhungkaw 600 zel thlan phawt a ni a. Trade thlan that te chu 18 Feb 2010 ah NLUP Board ah thehluh hman ngei tum a ni a ti a, Sorkar laipui flagship programme MGNREGP pawh tluang taka kalpui zeiin Job Card nei chhungkaw 18,041 awmin sawrkar kum kalmekah ni 80 inhlawhna kalpui mek a ni a, IAY hnuaiah mi rethei chhungkaw 115 te chenna in sak a ni tawh a ni, a ti.

District chhunga hmalakna dang tarlangin Pu.R.Liankima chuan, District Hospital Trauma Centre, OPD, Blood Bank, Administrative building bakah Ayush Hospital te, Education Deptt. hnuaiah hmalakna tamtak a awm tihte a sawi a. Loneitute hnenah pawh kumin chhungin Power Tiller 40 leh huan samna khawl 20 zet subsidy a pek a nih thu te, RGGVY hnuaia electric eng la nei lo te eng pek hna thawh a, 2010 chhunga hei hi zo hman tura tan lain Kolasib District chhunga chhungkaw 1700 hnena electric eng pek a nih tawh thu D.C chuan a sawi a. Fisheries, AH&Vety Deptt. ahte pawh mipuite eizawnna kawnga intodelhna thlensak tura nasa taka hma lak a nih thu a sawi bawk a, Republic Day denchhena Charitable Home 10 hnenah Rs.2350/- theuh tanpuina pek a nih thu Pu R.Liankima chuan a sawi bawk a ni.

Kolasib a Republic Day lawmna Ceremonial Parade ah hian Contingent 15 in March Past thiam takin an entir a. SSA Pipe Band ten mipuite hmaah music mawi tak tumin an thiamthil an entir bawk.

March Past a titha te hetiang hian tawmman pek anni. Uniformed Contigent ah I-na Mizoram Excise, II-na Ex-Serviceman leh III-na SJ. HSS Guides te an ni a. School Contigent ah I-na Govt. Diakkawn H/S, II-na SJ.HSS leh III-na Hmar Veng High School te an ni.