Republic Day 2013, Kolasib-a hman dan tur ngaihtuahin vawiin khan District Celebration Committee chu an chairman Pi Niharika Rai, IAS, DC hovin DC Conference Hall-ah an thukhawm a. Kumin Republic Day chu phur takin a ropui thei ang bera lawm nise an ti.

Meeting thu rel hma hian DC chuan thu sawiin India ram hunpui hmang tur hian Department tinte kan tan tlan a ngai a ni, a ti a. Mipui a tam thei ang ber he ni lawm tur hian District administration chuan a beisei dawn a ni, tiin inpuahchahna lamah pawh mawhphurtu zawng zawngte chu an tihtur theuh te tlin taka hlen tum theuh turin a chah a ni.

Zing dar 10:00-ah Republic Day hi Tumpui playground-ah neih a ni ang a, chhun dar 12-ah VIP At Home sawm bikte tan neih a ni ang. VIP Speech leh March Past te neih a nih zawh hnu ah Tableau hmuhnawm tak entir turin Committee chuan a rel bawk a. Department 8 - Envi & Forest, UD & PA, ICAR, DRDA, PHE, Agriculture, Horticulture leh PWD ten an Department theuh hnathawhte an entir dawn a ni. Kum danga tih thin angin chhawmdawlna In 10- ahte tanpuina pek a ni bawk dawn a, R- Day pual hian Drawing Competition/ Painting Competition school naupang tan buatsaih a ni ang a, Basketball (boys & girls ) leh Cricket (men) buatsaih a ni bawk ang.

Republic Day hi hlawhtling taka hman a nih theih nan leh a tam thei ang mipui an tel theih nan NGO zawng zawngte chu hemi ni hian eng programme mah siam lo turin Celebration Committee chuan a ngen a ni.