3358/2023-2024

2024 Pawlkut thla ni 16: Vawiin khan Kolasib District Review Committee on RIDF/WIF chu an Chairman, Kolasib District Deputy Commissioner (Bawrhsap) Pu John LT Sanga hovin Kolasib DC Conference Hall-ah an ṭhu khawm a. National Bank for Agriculture and Rural Development (NABARD) aṭanga Rural Infrastructure Development Fund (RIDF) hnuaia sum puk hmanga Kolasib District chhunga hmasawnna hna thawh hrang hrangte an thlir ho.

Chairman Pu John LT Sanga chuan Kolasib District chhunga RIDF hnuaia hna thawh hrang hrangte chu Kolasib District leh mipuite tan a pawimawh hle tih sawiin, hna enkawltu department hrang hrangte chu ṭha taka hna thawh zawh a nih theih nan ṭan la zel turin a chah a. RIDF chu District chhunga hmasawnna ruhrel dinna tura hmanraw pawimawh tak a nih avangin RIDF kal tlanga hma lakna tur pawimawh tak tak dang pawh rawt chhuah belh zel turin line department ai awh kal khawmte chu a chah a ni.

DLRC Member Secretary, NABARD hnuaia Kolasib District Development Manager Pu JD Traite chuan RIDF leh Warehousing Infrastructure Fund (WIF) awmzia leh NABARD aṭanga loan pek dan kalhmang tlangpui sawi fiahin, Kolasib District chhunga RIDF/WIF kal tlanga hna thawh zawh tawh leh thawh mekte a tar lang a. Implementing department ai awh kal khawmte'n an department hnuaia hna thawh mek dinhmun sawi fiahin, harsatna leh hmachhawp awmte an tar lang a. Kolasib District chhunga project kal mekte a hun takah ṭha taka thawh zawh a nih theih nana hma lak dan tur te, sum leh pai mamawh chak zawka dil chhuah a nih theih nana thil pawimawh te leh RIDF/WIF hnuaia hna thawh tur hmabak chungchang te sawi ho a ni bawk.

RIDF hi kum 1995-96 aṭang khan kalpui ṭan niin, sector pathum - ei leh bar deh chhuahna leh a kaihhnawih (agriculture & allied), vantlang nunphung tihhmasawnna (social) leh thingtlang inkal pawhna tihchangtlunna (rural connectivity) atan te sum puktir (loan pek) ṭhin a ni a. He'ng sector pathum hnuaiah hian hna thawh theih chi hrang hrang 39 a awm a ni.

Kolasib District chhung bikah department hrang hrang kal tlangin RIDF hnuaia hna thawh zawh tawh 58 awmin, he'ng atan hian RIDF loan ₹ nuai 11,982.94 pek a ni a. Hna thawh mek (ongoing project) 90 la awmin, hemi atana RIDF loan lak theih zat hi ₹ nuai 41,473.32 a ni.

Thlai leh bungraw dahna (warehouse) sakna atan bika NABARD aṭanga loan pek ṭhin WIF hnuaiah Kolasib District chhungah ₹ nuai 609.90 hmangin project paruk thawh zawh tawh a ni bawk.