3357/2023-2024

LUNGLEI;the 16th January, 2024: Vawiin chawhma dar 11:00 khan DC Conference Hall-ah district bawrhsap Pi Ramdinliani kaihruaina hnuaiah District level Consultative Committee on “Aspirational Block development-Lungsen” member ten meeting an nei. Sawrkar laipui atangin Mizoram chhunga district 3 atangin RD Block pakhat theuh: Aizawl district atangin Reiek RD Block, Saitual District atangin Ngopa RD Block leh Lunglei district atangin LUNGSEN RD Block te chu Aspirational Block atan an lo thlang a. Chumi kawnga hmalak dan tur chungchangah tahrik ni 14th September,2023 khan meeting hi lo neih tawh a ni.Nikum September atanga vawiin ni thlenga hma lo lak tawh dan leh hmachhawp hrang hrang te thlirho huangzau taka sawiho a ni.

Hun kal tawhah khan sorkar laipui chuan Mamit District chu Mizoram district dang te aia dawmkan ngai leh ngaihven ngai zawk tur Aspirational District atan a lo thlang tawh a, tun tumah chuan lo sawr zimin Block levelah an lo thlang leh ta a ni.

Vawiin meeting-ah hian Lungsen BDO office in an buatsaih Draft Block Development Strategy for Lungsen RD Block, Lunglei District chu chipchiar tak leh uluk taka zirho leh a ni a. He draft hi sorkar laipui in guidelines a lo siam zulzuia siam a ni. Lungsen RD Block hmasawnna tura hmalak dan tur chu Theme 5 hnuaia sector 9-ah SWOT( Strengths, Weaknesses, Opportunities & Threats) analysis hmangin; Key Performance Indicators(KPI) tehna hrang hrang 39 in Aspirational Block chhunga hmalakna hrang hrang leh hmasawnna te chu teh a ni dawn a ni.

Theme 5 te leh an hnuaia sector te chu:

1. HEALTH & NUTRITION
(a)Health
(b)Nutrition

2. EDUCATION
(c) Education

3. AGRICULTURE AND ALLIED SERVICES
(d)Agriculture

4. BASIC INFRASTRUCTURE
(e) Basic Infrastructure
(f) Drinking water
(g) Sanitation

5. SOCIAL DEVELOPMENT
(h) Financial Inclusion
(i)Social development

Meeting Chairman Pi Ramdinliani chuan meeting khuhhawnna thu sawiin, India ram Sorkar laipui leh State Sorkarin in a khua leh tui te chawikan nan leh tih hmasawn nana project/scheme hrang hranga a duan te reng reng chu Aspirational Block-ah hian kalpui vek tur a ni a.Chung scheme te chuan a dawng theihtu tur(Eligible) chhungkua/mimal chu a thleng ngei tur a ni a, tumah hmaih a thiang lo.Chuvangin ruahtui hul lai chuh hian concerned department official te nen Lungsen RD Block pawh kan fan kual a tul ang. Chung hunah chuan “on the spot” a Scheme hrang hranga beneficiaries thunluh( register) theih tur ang chi chu hmaih neih miah lova kan thunluh(register) nghal zel a tul ang. Scheme hrang hrang te chuan a dawng theihtu tur( eligible beneficiary) te chu a tuam vek (saturated) a tul a ni, a ti. Sawi zawmin, Pi Ramdinliani chuan Schemes hrang hrang kaltlanga sorkar laipui hmalakna reng reng Data driven a ni a, chuvangin bul kan tan phat atang hian kan statistics te hi a dik hle tur a ni. Chu mi atan chuan concern department te inberawnin, hmuhhmaih a awm em? siam that ngai a awm em? ti te hi fimkhur taka check reng tur a ni, a ti bawk. Vawiin meeting-ah hian Pu Lalrinsanga chu Aspirational Block fellow atana interview kaltlanga lak a ni thu tarlan a ni bawk.

Vawiin meeting-ah hian Centrally Sponsored Schemes hrang hrang khawih department official te bakah sawm bik te an tel a ni.