1822/2024-2025

Kolasib Dated the 29th August, 2024: Vawiin khan Kolasib District Review Committee on RIDF/WIF chu an Chairman, Kolasib District Deputy Commissioner, Pu Robert C. Lalhmangaiha hovin Kolasib DC Conference Hall-ah an ṭhukhawm a. National Bank for Agriculture and Rural Development (NABARD) aṭanga Rural Infrastructure Development Fund (RIDF) hnuaia sum puk hmanga Kolasib District chhunga hmasawnna hnathawh hrang hrangte an thlir ho.

Chairman Pu Robert C. Lalhmangaiha, Kolasib DC chuan Kolasib District chhunga RIDF hnuaia hna thawh hrang hrangte chu Kolasib District leh mipuite tan a pawimawh hle tih sawiin, hna enkawltu department hrang hrangte chu ṭha taka hnathawh zawh a nih theih nan ṭan la zel turin a chah a. RIDF leh WIF project te chu District chhunga hmasawnna ruhrel dinna tura hmanraw pawimawh tak a nih avangin RIDF leh WIF kaltlanga hma lakna tur pawimawh tak tak dang pawh rawt chhuah belh zel turin line department aiawh kal khawmte chu a chah a ni.

DLRC Member Secretary, NABARD hnuaia Kolasib District Development Manager Pu JD Traite chuan RIDF leh Warehousing Infrastructure Fund (WIF) awmzia leh NABARD aṭanga loan pek dan kalhmang tlangpui sawifiahin, Kolasib District chhunga RIDF/WIF kal tlanga hnathawh zawh tawh leh thawh mekte a tarlang a. Implementing department aiawh kal khawmte'n an department hnuaia hna thawh mek dinhmun sawifiahin, harsatna leh hmachhawp awmte an tarlang a. Kolasib District chhunga project kal mekte a hun takah ṭha taka thawh zawh a nih theih nana hmalak dan tur te, sum leh pai mamawh chak zawka dil chhuah a nih theih nana thil pawimawh te leh RIDF/WIF hnuaia hna thawh tur hmabak chungchang te sawi ho a ni bawk.

RIDF hi kum 1995-96 aṭang khan kalpui ṭan niin, sector pathum - ei leh bar deh chhuahna leh a kaihhnawih (Agriculture & Allied), vantlang nunphung tihhmasawnna (social) leh thingtlang inkalpawhna tihchangtlunna (rural connectivity) atan te sum puktir (loan pek) ṭhin a ni a. He'ng sector pathum hnuaiah hian hnathawh theih chi hrang hrang 39 a awm a ni.

Kolasib District chhung bikah department hrang hrang kal tlangin RIDF hnuaia hna thawh zawh projects 80 a awm a, hna thawh mek (ongoing project) 66 a la awm bawk. 

Thlai leh bungraw dahna (warehouse) sakna atan bika NABARD aṭanga loan pek ṭhin Warehouse Infrastructure Fund (WIF) hnuaiah Kolasib District chhungah project thawh mek (ongoing project) 3 la awm in FCS & CA Dept teh Horticulture Dept  leh Agriculture Department kaltlangin thawh mek a ni.