Vawiin khan Kolasib Shopping Centre-ah Road Safety Week, vawi 24-na Kolasib District Transport Office buatsaihin hman a ni a. Motor chi hrang hrang khalhtute hetah hian ko khawmin training pek an ni.

Pu MS Dawngkima, Addl. SP, Kolasib chuan inkhawm hi hmanpuiin Driver te hian Motor khalh kawngah mawhphurhna sang tak kan nei a. Motor chhunga kan thutluh chiah hian Dan leh Dun tamtakin min phuar a, him taka motor khalh chu kan mawhphurhna a ni tih kan hriat a tul a ni, a ti a. Kolasib District chhungah nikum khan Police chuan accident case 22 kan ziaklut a, chung zinga 19 chu an thi a. Chhiatna tam ber hi chu fimkhur loh vang a ni thin tiin training chu Driver ten uluk taka zir turin a chah a ni.

Pu Lalrinawma, DTO chuan Driver ten tihtur leh hriat tur tamtak an nei tih sawiin Motor khalh tur chuan Driving licence a pai ngei tur a ni a. Chak lutuka khalh te, hah lutuka khalh leh hrisel lo chunga khalh te a himlo fo tih hriat a tul a ni, a ti a. Ke-a kal tepawn lirthei kan hlauh thiam a tul takzet a, naupang motor hnaih lama kaltir tehi tihloh tawp tur a ni, a ti a ni.

Road Safety Week hmanna inkhawm hi Pu Vanlalvena, EI, Kolasib chuan a kaihruai a. Pu Lalengthanga, MVI leh Pu K. Laldingliana, O/C, Traffic, Kolasib ten training an pe a ni.