Mizoram sorkar-in NLUP a kalpui mekah Phase I leh Phase II ah chhungkaw 1139 in rubber chin an thlang a. Phase III leh IV ah chhungkaw eng emaw zatin an thlan belh bawk a. NLUP hnuaia rubber chinna hlawhtling taka kalpui a nih theih nan, Tripura state tih dan zirchiang turin Study Team ten January 31 khan Tripura an tlawh a. Tripura Chief Secretary leh sorkar thuneitu hrang hrang te hmu in Rubber Board of India, Tripura hotute pawh an kawm a. Betcherra-a rubber chinna hmun leh a sawngbawlna Processing Centre te an tlawh bawk a ni.

Study Team te hi Pu Rualzakhuma IAS (Rtd) in a ho va. Tripura Chief Secretary Pu S.K.Panda hova meeting neih ah Mizoram sorkar-in NLUP a kalpui mek a rubber chingtute hlawhtlin na turin Tripura sorkar chuan theih tawpa puih an inhuam tih Tripura Chief Secretary chuan a tarlang a ni. He meeting ah hian Dr.A.Rastogi IFS, Managing Director, Tripura Forest Development Corporation leh Pu Darlong, IAS, Secretary, Tribal Welfare Department te an tel a ni.

Study Team te hian Pu B.Debbarma IFS, Managing Director, Tripura Rehabilitation Plantation Corporation Ltd. chu a office ah tlawhin an kawm a. Tripura sorkar-in Ministry of Tribal Welfare hnuaia rubber beneficiaries te, an rubber chin puitlin hma kum 6 chhung a tanpui chhoh dan te a lo hrilh fiah a. Rubber Board of India leh Ministry of Tribal Welfare te kaltlanga hetiang scheme hmanga NLUP hnuaia rubber beneficiaries te enkawl chhoh dan tur ruahmanna siam dan tur chipchiar takin a lo kawh hmuh a ni.

Study team te chuan Rubber Board of India, Tripura-a Joint Rubber Produc tion Commissioner, Pu V.Mohanan chu a office ah an hmu bawk a. Hetah hian Pu S.K.Bhowmik, Dy. Rubber Production Commissioner, Rubber Board & Managing Director, Tripura, Latex Pvt.Ltd a tel bawk a. Meeting ah hian NLUP hnuaia rubber chingtu ten rubber chi tha ngei an chin theihna turin Rubber Board in a chi supply dan tur ruahmanna siam se, NLUP in Exit Protocol a buatsaih mek nen kal kawp thei turin rubber chingtute enkawl chhoh zel theihna tur ruahmanna siam ni bawk se, an ti a. Rubber Board of India hotute chuan Mizorama rubber chinna hmun te uluk taka rawn enpui a, an hlawhtlin ngei na tura theih tawp chhuah an inhuam tih an sawi.

Team Leader Pu Rualzakhuma IAS(Rtd) hi Dr.Robert Rualthankhuma, NLUP Project Co-ordinator, Dr.James L.T.Thanga, Mizoram University, Pu Hualthanga Chhakchhuak, Nodal Officer, Soil & Water Conservation leh Pu V.Z.Kaia, Member Monitoring Cell ten an tawiawm a ni.