Mizoram hmun dang rualin nimin khan Chapchar Kut lawmna chu ropui takin Kolasib ah pawh buatsaih a ni a. A lawmna programme hi Kolasib Tumpui Khelmual ah neih niin Horticulture Minister Pu P. C. Lalthanliana chu Kut Pa niin he hun hi a hmanpui a. Chapchar Kut puala MJA Kolasib District leh ZOOM tangkawp ten Photo Exhibition an buatsaih a hawng nghal bawk a ni.
Kut Pa Pu P. C. Lalthanliana chuan kan hnam rohlu leh a kaihhnawih te, kan hnam zia rang leh kan hnam tihdan te kan ngaihsan a, kan chawinuna, kan chawm chho zel hi Mizo hnam damna tur a ni a. Chapchar Kut kan hman leh kan lawm hi hnungtawlhna lam a ni lo a, hma lam kan pan zelna ani zawk a. Hun lokal zel turah kan hnam ziarang leh Mizo nun zemawi kan vawnthata thartharte kan hlan chhoh zel hi a pawimawh a, hei hi kan zavai mawhphurhna a ni, a ti a. Tunlai khawvel thang chho leh inher danglam zelah hian kan ngaihtuahna leh kan rilru a Mizo chuan kan hnam nihna kan hlauh lovang a ti bawk. Kolasib DC leh a thawhpuite ten a Mizo thei ang berah Chapchar Kut hman anih theih nana ruahmanna leh programme an duan leh siamte chu fakawm a thi thu a sawi bawk.
Kut Thlengtu Kolasib Bawrhsap Pu H. Lalengmawia, IAS chuan tunlai khawvel chak taka hma sawn zel karah kan hnam rohlu, kan tawng, kan ziarang leh kan Mizo nun zemawi hi kan vawn that a kan chawinuna, a taka kan lantir loh chuan hmasawnna hian min lem zo palh ang tih a hlauhawm a. Mahse nghet taka Mizo pipute tlawmngaihna leh Mizo nun zemawia kan ding chuan eng thlipui mahin Mizo hnam hi min nuai bo thei lovang, a ti a. Sawrkar in hmangchang hre taka Chapchar Kut hmanna atana sumfai cheng nuai khat District a pekah lawmthu a sawi bawk a ni.
Chapchar Kut Organzing Committee, Working Chairman Pi Maria CT Zuali chuan Kut ruahmanna dan leh programme chhawpchhah turte chanchin tawi sawina hun a nei bawk.
Nimina Chapchar Kut lawmnaah hian MCO Sub Headquarters leh sikul hrang hrang naupangten Mizo hnam lam chi hrang hrang - Cheraw, Chai, Chheihlam, Tlanglam leh Siktuithiang lam te an entir bakah Khuangchawi leh Miruang inchuh te entir a ni bawk a. MHIP Sub Headquarters in Mizo incheidan hmanlai atangin tunlai hun thlengin Costume Parade neiin an entir a. Heng bakah hian zaithiam ten hun hmangin programme mitlung tak mipui tan chhawpchhuah a ni a. Kut Pa in Kut Sa semin thingpui leh kurtai, bal chhum leh Mizo ei in thil te sem a ni bawk.
Kolasib-a Chapchar Kut lawmna ah hian District mipui za tel an tel a. CIJW, Vairengte a hotupa Brig. Ahuja leh a officer pui mi engemaw zat leh Kolasib a PSU a hotu engemaw zat ten Chapchar Kut programme hi an chhim bawk a. Cachar, Hailakandi leh Karimganj DC, SP leh DFO te sawm a ni bawk a mahse anni hi programme dang pawimawh an neih avangin an lo tel thei lo a ni.
