Mizo te Kut ropui ber Chapchar Kut 2016 chu Mamit ah pawh ropui taka hman a ni a, Pu Lalmalsawma IAS Chief Secretary Government of Mizoram chuan KUT PA niin a hmanpui a, Pi Lalbiaksangi District Bawrhsap chu Kut Thlengtu a ni.
Vawiin Chapchar Kut hmanna ah hian Kut Pa, Pu Lalmalsawma chuan Chapchar Kut hmangtu mipuite chibai bukin Kut hlimawm tak hmang turin duhsakna a hlan a, Mizo Pi leh Pute atanga kan zia Aia Upa te zahthiam, Tlawmngaihna, Hnam nun leh zia rang te chhawm nung reng chunnga Kut hmang turin Kut hmangtute a chah a ni.
Kut hmanna ah hian Mamit khawpui chhung YMA Branch hrang, MHIP leh MCO Mamit atangin hnam lam entir a ni a, hei bakah hian khawpui pawn Kawrthah, Rawpuichhip leh Suarhliap atang ten Mizo hnam lam entir a ni bawk. zaithiam Teteii Ralte, Thangromawia Thomte, Khawtlang Lelte Top three te bak ah Mamit khawpui chhung atanga zaithiam ten hnam hla mawi tak tak hmangin mipui an awi a ni.
Chapchar Kut 2016 hmanna hmun khelmualah hian Mau hmangin chawlhbuk Khawpui chhung YMA Branch paruk te leh Department tangkawp in sak a ni a, hetah hian Mizo thil chi hrang hrang leh Mizo siam ei leh intur lei theihin chhawpchhuah a ni a, Miss Chapchar Kut 2016, Naupang leh Mizo mipa atangin Hnam thuam inbel tha ber thlan chhuah niin lawmman hlan an ni.
Vawiin Kut hmanna hun hi 181 Bn BSF atang leh Mizoram Sawrkar atangin Official ten an rawn hmanpui a, Kut Thlengtu Pi Lalbiaksangi District Bawrhsap chuan thusawiina a nei bawk.
