2258/2023-2024

2023 Khuangchawi thla ni 10: October ni 5 atanga ni 12, 2023 inkar chhunga Right to Information (RTI) Week hman mek pualin vawiin khan Kolasib DC Conference Hall-ah Kolasib District Bawrhsap Pu John LT Sanga hovin hun hman a ni.

He huna Khuallian, Kolasib Bawrhsap Pu John LT Sanga chuan mipui rorelna India ramah khua leh tuite'n sawrkara kan hriat duh hrang hrang kan zawh theih nan RTI Act, 2005 kan nei a, hemi hmang hian sawrkarin eng nge a kalpui, eng nge a thlen chin tih te kan hriat duh a zawh theih reng a ni tiin, RTI chu lang tlang sawrkar a din theih nan leh khua leh tuite'n kan chanvo kan chan theih nana hmanraw pawimawh tak a ni, a ti a. District chhunga sawrkar hma lakna te, sawrkar thil kalpui dan hrang hrangah te tihsual leh kalpui that loh a awm loh nana lo venpui turin mipuite'n RTI hman tangkai leh hman thiam a pawimawh tih a sawi a. Sawrkar hna thawkte'n zawhna zawttute harsatna siam zawng ni lovin, a hun taka chhanna pe thei turin hma kan la tur a ni tiin, zawhna zawttute pawhin sawrkar hna thawh tibuai zawng ni lovin, a puibawm leh nawr kal zawnga RTI chu hman tum hram hram a pawimawh, a ti a. Kolasib District-ah hmasawnna chak zawk a awm theih nan RTI chu tangkai taka hmang zel turin District mipuite a chah a ni.

RTI Week puala hun hman hi Kolasib Additional Deputy Commissioner Pi Melody Ngurthantluangi chuan a kaihruai a. Kolasib District Fisheries Development Officer & RTI District Resource Person Pi C. Lallianpuii chuan powerpoint presentation hmangin RTI Act & Rules chungchang a zirtir a. Zawhna leh chhanna leh sawi hona hun hman ni bawkin, Kolasib District Rural Development Office-a Project Director Pu Lalmuan Puia chuan lawm thu sawiin hun a khar a ni.

Vawiina Kolasib-a RTI Week puala hun hmanah hian sawrkar office hrang hranga Departmental Appellate Authority (DAA), State Public Information Officer (SPIO) leh State Assistant Public Information Officer (SAPIO) te, tlawmngai pawl hruaitute, District MJA te leh RTI activist-te bakah, Government C. Zakhuma HSS zirlaite leh St John's HSS zirlaite an tel a ni.