2257/2023-2024

2023 Khuangchawi thla ni 10: Nimin tlai khan Mizoram Legislative Assembly Inthlanpui, 2023 buatsaih tur chungchangah Kolasib District Election Officer Pu John LT Sanga chuan Kolasib DC Conference Hall-ah thu thar theh darhtute kawmin, he Inthlanpui buatsaih tur chungchanga thil pawimawh hrang hrang a sawipui.

Kolasib DEO Pu John LT Sanga chuan chhun lamah Election Commission of India (ECI)-in state pangaa Legislative Assembly Inthlanpui neih hun tur a puan thu tar langin, he'ng state panga zingah hian Mizoram pawh a tel angin November ni 7, 2023-ah MLA Inthlanpui neih tur a nih thu leh December ni 3, 2023-ah vote chhiar tur a nih thu a sawi a. Inthlan puan a nih rualin election model code of conduct (MCC) hman nghal a ni tih sawiin, inthlanna thianghlim leh felfai neih a nih theih nan team hrang hrang - flying squad team, video surveillance team leh sector magistrate te chuan an mawhphurhna ṭheuh an thawk ṭan tih a sawi a. MCC hman a nih tak avangin scheme hrang hrang thawh theih a ni tawh dawn lo va, scheme kal lai mek (on going) a nih chuan enfiah hmasak a nih hnuah phalna pek chi a nih chauhvin sum hman phalna pek a ni dawn tih sawiin, Minister-te leh MLA-te chu official function-ah an tel a rem tawh dawn lo tih a sawi bawk.

DEO chuan inthlan kaihhnawihah Voters' Helpline (1950-toll free) leh cVIGIL app te ṭangkai taka hmang turin mipuite a chah a; political party-te pawhin public rally an neih dawnin phalna an lak vek a ngaih tawh dawn avangin he'ng mobile app-te hi hman nachang hre turin a chah a. Kumin MLA Inthlanpuiah Kolasib District-a vote nei zawng zawngte chu vote thlak tum ṭheuh turin a sawm nghal a ni.

He hunah hian DEO hi Kolasib District Sr Superintendent of Police Pu Lalrinawma Traite, 4-Tuirial (ST) A/C-a Returning Officer Pi Melody Ngurthantluangi, 6-Serlui (ST) A/C-a Returning Officer Pu Lalmuan Puia, Election Officer leh ARO-te'n an ṭawiawm a. District MJA member eng emaw zat telin, zawhna leh chhanna leh sawi hona hun hman a ni bawk.

ECI-in inthlan hunbi a ruahman dan chuan gazette notification chhuah hun atan October ni 13, 2023; inthlan chuh tum hming pek luh hun hnuhnung atan October ni 20, 2023; hming pek luhte endik hun atan October ni 21, 2023; candidate inhnuhdawh theih hun hnuhnung atan October ni 23, 2023 te ruat niin, December ni 5, 2023 hmain inthlanna kaihhnawih zawh fel hman tum a ni.

MLA Inthlanpui, 2023 lo awm turah hian Kolasib District-ah polling station 89 awmin, Tuirial bialah polling station 26, Kolasib bialah polling station 29 leh Serlui bialah polling station 34 a awm a. Ruahman dan chuan electronic voting machine/voter verifiable paper audit trail te chu vote thlak zawh veleh strong room awmna Government Kolasib College-ah luhpuiin, vote chhiar a nih hma chuan sipaite'n an venghim dawn a ni.

Kolasib district-ah hian inthlan buaipuitu turin Kolasib bialah DEO Pu John LT Sanga chu returning officer atan ruat a ni a; amah pui turin assistant returning officer pahnih Pu Lalhmachhuana, SDO (Sadar) leh Pu Gilbert Lalhlimpuia, SDC te ruat an ni a. Tuirial bialah Additional DC Pi Melody Ngurthantluangi chu RO niin, amah pui turin ARO pahnih Pu Cheemala Siva Gopal Reddy, SDO (Civil) Kawnpui leh Pi F. Lalnisai, BDO Thingdawl te ruat an ni a. Serlui bialah RO turin DRDO Project Director Pu Lalmuan Puia ruat ni thungin, amah pui turin ARO pahnih Pu Lalremruata Sailo, SDO (Civil) Vairengte leh Pu Henry Malsawmtluanga, BDO Bilkhawthlir te ruat an ni bawk.

Tun ṭum MLA Inthlanpui atan hian Kolasib District-ah vote nei mipa 30,603 leh hmeichhia 32,859, an vaiin mi 63,462 an awm a ni.