2256/2023-2024

LUNGLEI the 10th, October' 2023: Vawiin khan Convention Centre Lungleiah Right to Information(RTI) Week 2023 chu hman a ni. Lunglei DC Pi Ramdinliani, IAS chuan khuallian niin a hmanpui. He hun ah hian Lunglei District Head of Office te, SPIO, SAPIO, MJA, YMA, MUP, MHIP hruaitute leh RTI Practitioner te an tel a ni.

He hun hi Pu Donny Lalruatsanga, Addl. DC, Lunglei chuan kaihruaiin Khuallian Pi Ramdinliani chuan RTI hi sorkar hnathawk ten kan hmelma en thin a, tunah erawh kan hmang tangkai tan ta hle a ni a ti. He dan kan hman tantirh khan mipui pawhin kan beisei sang vaklo niin a lang a,tunah erawh kan ram inrelbawlna leh kan khua hmasawnna ruhrel din dan hre turin RTI Act hmang an tam tak tawh thu a sawi. Hetihrual hian RTI Act hman ngai miahlo chi a awm laiin RTI Act hmang kher tur a in tih a awm thin a, hei hi nachang hriat loh vang nge, thil tul miahlo a ni tih sorkar hnathawk ten kan hriat a tul a ni a ti. Sorkar Department tam takah miin thil an dilin engatan nge i tih ti a zawh let te an ching a, hei hi kan tih miah loh tur leh zawh thiang lo a nih thu a sawi a. Sorkar hmalakna leh hnathawh hriat chu khua leh tui te chanvo a ni a ti bawk. He dan hi anih tur anga hman tangkai a nih theih nan RTI hnuaia mawhphurhna chelhtu SPIO leh SAPIO te chu he dan hi zirchianga, a hun chhung ngeia chhanna pe chhuak thin turin a chah a ni. Lunglei District mipui te chu RTI Act hmang tangkai chhunzawm zel turin a sawm bawk a ni.

Pu N.Vabeiratlua, Dy, Director,DIPRO Lunglei chuan RTI chungchang mipuite leh Public authorities hrang hrang hriattur pawimawh te leh Mizoram a RTI kalpui dan leh dinhmun te Power Point Presentation hmangin a hrilh fiah a. Zawhna leh chhanna hun hman nghal a ni bawk.