Vawiin Dar 11: 00 AM khan Kolasib DC Conference hall ah Right To Information Week 2017 hawnna hun hman a ni.

He hunah hian Kolasib DC Pu R Zarzosanga chu Chairman niin a kaihruai a, Chairman chuan RTI chungchang sawihawnna a nei a, RTI chu Sawrkar leh Mipui inkara langtlang taka thil a kal theih nana duan a nih thu sawiin, hlemhletna nuai bo a Sawrkar mawhphurna hlen thei (Accountable) a lo awm theih nana hmanraw pawimawh tak a nih thu a tarlang bawk a ni. Mipuiten tangkai taka hmang se a duh thu a sawi a, hmang tangkai tur chuan zir chian leh hriat chian (Awareness) a pawimawh thu a sawi bawk a ni.

Pu Collin Hlychho DIPRO, Kolasib chuan RTI Act 2005 chungchangah power point presentation pe in RTI kalphung leh a kaihhnawih chungchangah kalkhawm te nen zawhna leh chhanna hun hman a ni bawk.  Pu H Vanlalnghaka, President MJA Kolasib District chuan thusawina hun nei bawkin RTI Act chu Sawrkar langtlang a lo awm theih nana duan a nih angin, RTI Act chu mipuiin Sawrkar laka kan thil hriat duh te hriat theihna hmanraw thatak a nih thu a sawi a. RTI Act chu Sawrkar emaw mimal beihna ni lovin mipuite ina Sawrkar kalphung leh hmalakna hrang hrangte langtlang zawka an hriat theih nana duan a nih angin rilru thianghlim pu chunga hmang turin kalkhawm te a chah a ni. Kolasib khawpui chhunga RTI Act zawhna a  tlahniam chuan Sawrkar Office hrang hrangte chu langtlang leh tha takin an thawk tih a lantir a, Sawrkar officer leh Staff te inpekna chu fakawm a tih thu a sawi bawk.

He hunah hian Kolasib District a RTI Week Slogan writing Competition a Lawmman pakhatna dawngtu Govt. Kolasib College zirlai  Tv Malsawmkima hnenah Chairman in lawmpuina Citation leh pawisa fai cheng 2000/- a hlan a. Malsawmkima hian a slogan ziah “ Right to Information:  I Zalenna, I Chakna, I Dikna, I Chanvo; I Hmangaih I Ram Thianghlimna tura Ralthuam I banphak mai a awm chu a ni” tih chu Mizoram pumpuiah pakhatna a nihpui bawka, October ni 5 khan Aizawl ah Chief Minister Pu Lal Thanhawla hnen atangin Lawmpuina Citation leh Pawisa fai cheng 4000/- alo dawng tawh bawk a ni. Hawnna inkhawmah hian Kolasib khaw chhunga Office hrang hrang a RTI nodal Officer leh Dealing Staff te an tel tha hle a ni.