Mizoram State Law Commission Meeting tum 35-na chu vawiin chawhnu khan an Chairman, Pu John Siamkunga, MLA kaihhruaiin a Office Chamber-ah neih a ni. He meeting-ah hian Law Commission hmachhawpa lo neih tawh, Mizoram chhunga dan hman mek zinga siamthat tul awm emaw, hmanzui tul lo emaw, dan tha zawk siam ngai te siam dan tur chu thlirho a ni a, hemi chungchanga Department hrang hrang hmalakna te sawiho a ni. 

Pu John Siamkunga chuan member-te inpekna hlu tak avangin Commission-in hna tha takin a thawk thin thu sawiin, Department hrang hrangte pawh an Dan hmanlai te zirchiang Ieh zual tura a duh thu leh, chu chu fel zawka mipui rawng an bawl theihna atan kawng khat a nih thu a sawi a ni. 

Law Commission Secretary, Pu Zahmingthanga Ralte chuan Mizorama dan hman hrang hrang te chu Sawrkar laipui siam a ni emaw Mizoram Sawrkar siam a ni emaw thliar bik nei lova ennawn a nih thu a sawi a. Hma lak a nih mek laiin Central Sawrkar chuan sawrkar laipui dan siam zinga hman tul tawh lo a a ngaih te nuai bo hna a kalpui tak avangin Sawrkar Iaipui dan bik chu State Law Commission hian a enzui ta lo a ni, a ti. Mizoram sorkar dan siam bikah chuan dan engemaw zat hman tul tawh lo nuaibo turin Commission-in rawtna a siam tawh thu leh, heng rawtna te hi a kaihhnawih department hrang hrangah thlen a nih tawh thu leh Department lam hmalakna pawh ngaihchan zui zel a nih thu a sawi a ni. 

Meeting hian dan ennawn leh siamthat kawnga hmalakna kal mekte chu State Law Commission chuan enpui zui zel a, Commission rawtna te tih hlawhtlin a ni ngei em tih thlirho Ieh nise tiin a rel a. Hemi kaihhnawihah hian Commission chuan hetiang lama thiamna bik nei te leh tui mite nen remchang hmasa berah inrawnkhawmna neih ni se an ti bawk.

Mi tupawh dan siamthat, paih leh ennawn chungchanga rawtna nei emaw, ngaihdan emaw siam duh te chuan Mizoram State Law Commission Office, New Secretariat Complex-ah thehluh theih reng a ni a, rawtna awmze nei te chu Commission-in a dawng duh reng a ni.