Vawiin chawhma khan RMSA Champhai District huaihawtin Government Champhai High School tualzawlah  Kala Utsav ( Festival of Arts) 2017 hman a ni a. He hunah hian Champhai District Bawrhsap mawhphurhna la mektu Pi Zosangzuali Pachuau, Project Director, DRDA Champhai chu khuallian a ni. 

Khuallian Pi Zosangzuali Pachuau chuan Ministry of Human Resources & Development (HRD) hnuaia RMSA buatsaiha school naupangte thiamthil  entirna hun siam ani chu lawmawm a tih thu a sawi a.Hnam changkang apiangin hnam rohlu leh thiamthilte an ngaipawimawhin an hlut thiam thin a ni, a ti a. Champhai District aiawh High School ten kum hnih lai Kala Utsav inelna huanga State ai an awh thei chu a chhuanawm hle a ni a ti bawk. Kala Utsav hmangtura kalkhawm high school zirlai naupangte chu hun nuam tak hmanga hlawkpui theuh turin duhsakna a hlan nghal a ni.

Kal Utsav 2017 hmanna programme hi Pu C.Lalbiakzauva DEO/DPC (RMSA) in a kaihruai a. Pu C. Hualrikhuma, Dy.DPC (RMSA) in report a pe a. Pu Satthanga, Head Assistant, DEO Office-in lawmthu sawina neiin hun a khar a ni.

Kala Utsav 2017 hmannaah hian Champhai leh a chhehvel atangin High School 11 lai an tel thei a. Champhai pawn atangin Vapar Secondary School leh Govt. Hnahlan High School te an tel a.  Zirlai ten Mizo lam mawi tak tak, malzai leh lemchante entirin programme hlimawm tak hmanho a ni.

Kala Utsav hi Kum 2015 atang khan  RMSA huaihawta neih thin a ni a. Nikum thleng khan inelna (competition) anga kalpui thin niin District, State leh national level thlenga inelna buatsaih thin a ni. Kumin bikah chuan inelna lam hawia kalpui lovin intihhlimna ang zawnga neih a ni ve thung a. Kala Utsav inelnaah hian Champhai District aiawh Holy Cross High School ( Drama/Theatre, 2015) leh Govt. GM High School ( Chheihlam Dance, 2016) te chuan Mizoram State aiawhin national levelah an lo inlan tawh  a ni.