2146/2025-2026

Dated Kolasib the 16th September 2025: Vawiin khan Kolasib Diakkawn YMA Hall ah Kolasib DC Office huaihawt in ruihhlo awmze nei zawk a do leh ILP fimkhur leh khauh zawk a kalpui dan tur chungchangah zirhona seminar- legal awareness Seminar on ILP and reduction of illicit trafficking of contraband drugs neih a ni a. He hunah hian Kolasib District khaw hrang hrang atanga khawtlang leh YMA hruaitute leh Police leh Excise Department atangin an kalkhawm a, Pu Robert C Lalhmangaiha, Kolasib DC in hun a kaihruai a ni.

Pu Robert C Lalhmangaiha chuan he hunah hian thu sawiin, Kolasib District chu ramri depa awm anih avangin kawng hrang hrangah a pawimawh takzet a ni a ti a. Ruihhlo in kil tin atangin kan ram a hrut a, chu mai piah lamah Assam ramri atangin a rawn leh luh bawk a, hei hi kan ram min tichhetu ani tih kan hriattlan avangin Sawrkar , a bik takin Police leh Excise te, YMA te, Khawtlang leh Kohhran ten anmahni zawn theuh ah theih tawpin a dan chah nan hma an la a ni, a ti a. He an hmalakna te hi a thlawn mai dawn lo a ni tih hria a chak leh zual a thawhhona tha tak neia ruihhlo do zawm zel turin kalkhawmte chu a chah a ni.

He hunah hian Pu David H Lalthangliana, Kolasib Sr. SP pawhin thu sawiin, ruihhlo do nana Kolasib District Police ten an hmalakna hrang hrang a tarlang a. Sr SP hian Kumin January ni khat aatnga vawiin thlenga ruihhlo man chungchanga Police te hnathawh tarlangin; ND&PS hnuaiah Heroin 89.75gm leh meth kg 23 man a ni tawh a. Ruihtheihthil dang Ganja te nena a belhkhawmin heng an man te hi cheng Vaibelchhe thum, nuaih hnih leh sing li chuang man hu a ni a ti a.Zu hi Indian made foreign Liquor (IMFL) an man ho hi litre 9208 niin, beer litre 2000 chuang man man a ni tawh bawk a, heng hi a zavaiin cheng nuaih 56 leh cheng sing li hu a ni, a ti. Heng bakah hian Kuhva ah bag 14254 man tawh niin, criminal case 8 siamsak tawh anni, a ti bawk.

ILP chungchang pawh SP hian tarlangin, kumin chhungin ILP diklo chungchanga mi 166 chungah action lak tawh a ni a ti a, mi 150 push back anni tawh a ni, a ti bawk. Heng zawng zawng avang hian theihtawp a Police te hmalakna thlawp a thawhpui turin kalkhawmte chu a ngen nghal bawk a ni.

Vawiin hunah hian Pu H Vanlalhriata, CJM Kolasib te, Pu Vanlalbiakzauva, SDO(C) Vairengte te leh Pu Chinlianmanga, SDO (C)Bairabi te hnena tangin zirtirna ngaithlak a ni a, Pu V L Muana Rokhum, Asst Commissioner, Excise and Narcotics Dept leh Pi B Malsawmtluangi, Addl DC Kolasib hnen atangin thusawi tawi ngaihthlak a ni bawk.

He hunah hian ruihhlo awmze nei zawka do dan leh ILP khauh zawka kalpui dan tur chungchanga sawihona - Group Discussion neih nghal a ni a, vawiina resource person te hian sawihona hi kaihruaiin, tul leh pawimawhte inhrilhhriatna neih nghal a ni.