Nimin khan Kolasib DC Conference Hall-ah Line Department hrang hrang aiawh ten Model Village Saansad Adarsh Gram Yojana (SAGY) chungchang leh hemi atana Village Development Plan (VDP) siam nana kaihhruaina leh a keng tel thil hrang hrang te inzirtirna leh inhrilhhriatna atan Workshop buatsaih a ni.
Workshop hawngtu Kolasib DC Pu Jitender Yadav chuan Model Village-a Line Department ten an tih tur an chiang a tul a, Model Village hi Bial chunga khaw entawntlak tur anih dawn avangin kawng engkima hmasawn tak anih a ngai dawn a chuvangin Department aiawh te chu hemi atan hian theitawp chhuah turin a ngen. Mipuite chu hemi atan hian a hranpa in sum ruahman a awm lo tih pawh hrilhhriat a tha tih sawiin DC chuan an sum neihsa atangin he ruahmanna hi kalpui tur a ni, a ti.
Workshop kaihruaitu SIRD Director Pi Maria C.T. Zuali chuan SAGY in a tum te tarlangin Village Development Plan siam dan ruangam te a sawifiah a. Dr. H.Laldinmawia (Co-ordinator BRGF) pawhin SAGY chungchang sawizauna neiin zirtirna a pe bawk a ni.
Tarlan tawh angin Kolasib District chhunga hian Model Village tur pathum thlan a ni a. Turial MLA Bial ah Thingdawl, Kolasib MLA Bial ah Meidum leh Serlui MLA Bial ah Saiphai te chu Model Village atan thlan te an ni.
