Vawiin khan SSA Mission, Kolasib District buatsaihin zirna in leh zirlai naupang ten faina leh thianghlimna kawnga chak zawka an pen nan Diakkawn YMA Hall-ah programme chikhat 'Observation of one day programme for Clean School Movement' tih chu hman a ni a. He programme-ah hian Kolasib DC Pu H. Lalengmawia, IAS chu khuallain niin a hmanpui a ni.

Pu H. Lalengmawia chuan faina leh thianghlimna kawnga beihpui kan thlak hian ni khat emaw, thla khat emaw, kum khat emaw fai a kawk lova faina leh thianghlimna hi kan nunah kan sengluh leh nitina kan damchhunga kan nunpui tur a nih thu a kawk zawk a. Naupang leh zirna in fai turin zirtirtu te an pawimawh a, kawng engkima naupangte tan entawntlak an nih a ngaiin, a tul a, an inchei dante, an chezia te leh an tawngkam hman te thlengin an ulukin an fimkhur tur a ni, a ti a. Faina kan tih hian pawnlam leh a lang chin chiah a huam lova rilru chungril faina leh thianghlimna a huam bawk a. Kan thinglung a fai loh va, kan rilru leh ngaihtuahna a thianghlim loh chuan harsatna tam tak kan tawk a, chumiin a hrinchhuah chu suahsualna leh beidawnna te an ni a. Heng thil te hian zirlai naupangah nghawng tha lo neiin an rilru leh an ngaituahna thlengin a hruai sual theiin sual rawngbawlna kawngah a hruai lut thei a. Chuvangin naupang kan enkawlna kawngah zirtirtu leh nu leh paten naupangte rilru a thianghlim a, a fai a, an ngaituahna a dik leh tha turin zirlai bu piah lam value system leh moral lam kan in zirtir a ngai a ni, a ti bawk.

Vawiin programme-ah hian Block Level leh District Level a sikul fai ber leh faina leh thianghlimna thupui hmanga naupangte tan lemziah intihsiakna lawmman sem a ni bawk a. District Level a Sikul fai ber lawmman dawngtu chu Govt. M/S I Lungdai a ni a; pahnihna chu Govt. T.S. Luaia M/s Kolasib niin pathum chu Govt.P/S III Bilkhawthlir a ni a. Pakhatna hian sumfai cheng 10000, pahnihna in cheng 7000 leh pathumna in cheng 5000 bakah citation a keng tel vek a. Heng lawmman te hi DC in a hlan bawk a ni.

Kolasib Education Block huam chhunga sikul fai ber lawmman chu Govt. T.S Luaia M/S Kolasib in an dawng a; pahnihna chu Govt. P/S III Bilkhawthlir leh pathumna chu Govt. M/S I Thingdawl te an ni a. Kawnpui Education Block huam chhunga sikul fai ber lawmman chu Govt. M/S I Lungdai in an dawng a; pahnihna chu R.L. Kamlala M/S Bualpui 'N' leh pathumna chu Govt. M/S Bukpui te an ni a. Block Level a pakhatna hian cheng 6000; pahnihna in cheng 4000 leh pathumna in cheng 2000 bakah citation a keng tel theuh a ni.

Faina leh thianghlimna thupui hmanga lemziah intihsiaknaah pakhatna chu Lalduhsanga, St. Maria Goretti M/S Kolasib niin pahnihna chu Lalrinsanga, Govt. M/S Meidum leh pathumna chu R. Lalhmingmawii, Chanmari UPS Kawnpui te an ni a. Consolation Prize dawngtu te chu Zothanpuia, Govt. P/S III Bilkhawthlir, Lalnunsanga, Govt. M/S Serkhan leh Lalramfima, Govt. M/S Saiphai an ni.

Vawiin programme Pu JR Lalhruaitluanga, DPC SSA Mission Kolasib District kaihhruaiah hian DEO, SDEO te, SSA, RMSA hotute te bakah zirlai naupang leh zirtirtu thahnem tak an tel a ni.