2778/2026-2027

Kolasib, 22nd October, 2026: Vawiin chawhnu khan School of Nursing Thingdawl (SONT), Kolasib chuan Diakkawn YMA Hall, Kolasib-ah General Nursing & Midwifery (GNM) 8th batch zirlaite lukhum khumtirna leh khawnvar chhit (Capping and Lamp Lighting Ceremony) ruala thutiam lakna hun leh, 7th batch SONT aṭanga zir chhuakte hnena certificate hlanna hun (Graduation Ceremony) ropui takin an buatsaih.

He hun hi Mizoram Sorkara Health & Family Welfare Department hnuaia Joint Director, Directorate of Nursing, Pi Lalchhanhimi chuan khuallian niin a hmanpui a. Khuallian chuan zirlaite leh zir chhuak tate fuihna thu sawiin, "Graduate tharte leh nurse zir tura lukhum khum thar ten Pathian leh mipui hmaa an thutiam hi a thutak hle tih an hriat reng a pawimawh a ni," a ti. Damlo enkawltute'n damlote tana an tih theih sang ber chu ṭawngkam leh chetziaa hmangaihna lantir a nih thu sawiin, damlote chu ti tak zeta hmangaih leh duhsak a pawimawh thu a sawi a. Nurse-te chu damlote nena inhnaih ber an nih angin, damlote enkawlna chu an kutah a innghat thuk hle tih a sawi bawk. Florence Nightingale-i zinkawng leh a nun aṭanga zir chhuah tur an neih thu tarlangin, SONT Kolasib-a zirlaite chu ram leh midangte tana rawngbawl thei turin ṭha taka an zirlai zir chhuak theuh tur te, zir chhuak tawhte pawh nurse hna zahawmna chawi nung zel tur leh midangte tana malsawmna nih tum zel turin a chah a, duhsakna a hlan nghal a ni.

He hunah hian Pi Zochhuanpuii, Registrar, Mizoram Nursing Council chuan 8th batch zirlai tharte chu lukhum khumtirin, khawnvar a chhittir a; zirlai tharte hian thutiam an sawirual nghal bawk. Pi Zochhuanpuii chuan lukhum chu nurse hna zahawmna kengtu pakhat a nih thu sawiin, lukhum var chuan thianghlimna leh damlo, mi harsa leh mangangte tana inhlanna leh inpekna a entir tih a sawi a. Khawnvar chhit chu hriatna 'eng' hmanga midangte tanpui tura inpekna entirtu a nih thu a sawi bawk. Hemi rual hian Florence Nightingale-i hniakhnung zuia midangte tana beiseina mei eng chhi zel tura intiamna a nih thu a sawi a ni.

Inkhawmah hian Pi Laltanpuii, Principal, SONT chuan inlawmna thu sawiin report a pe a. Nl. Grace Vanlalhriatpuii chu Mizoram Nursing Board examah topper a ni a. First year examah pahnihna (2) leh parukna(6) an hauh a,Second year examah pathumna(3) leh pariatna(8) an hauh a, Third year examah pakhatna (1) leh Pakuana(9) an hauh thu a tar lang. SONT Choir te'n hawnna hla mawi tak an rem bawk a ni. Pi Zosangliani, Nursing Officer, District Hospital Kolasib chuan hunserh a hmang a, Rev. C. Lalremsanga, PCI Diakkawn Pastor Bialtu chuan graduate tharte leh nurse tharte pualin ṭawngṭaisakna hun a hmang a ni. Dr. RK Lalthlamuana, Sr. Medical Officer, Kolasib chuan zirlai tiṭha leh 100% attendance neite mi 6 hnenah lawmpuina a sem a. Hemi bakah hian Mizoram pum huapa Nurse zirlai exam-a tiṭha, zirlai mi 7 te hnenah Merit Prize hlan an ni bawk.

School of Nursing Thingdawl, Kolasib hi December 2017 khan zirlai 20 awma bul ṭan a ni a, tunah hian batch 7-in an zir chhuak tawh a ni. GNM hi pawl 12 pass hnua zir theih niin, kum 3 zir (course) a ni. Tun dinhmunah SONT Kolasib-ah hian Principal 1, tutor 6 leh non-teaching staff 11, an vaiin thawktu mi 18 an awm mek a, zirlai 60 an awm bawk. Tun ṭumah hian 7th batch aṭangin mi 20 (hmeichhia vek) an zir chhuak (graduate) a, 8th batch 1st year zirlai 20 (hmeichhia 17 leh mipa 3) ten thutiam hi an la thar ve thung a ni.