2779/2026-2027

Aizawl, the 22nd October, 2026: Vawiin khan Mizoram State Project Monitoring Committee (MSPMC) chuan an Vice Chairman Pu R. Lal Rinawma hovin Lengpui Airport cheithat hna thawh mek 'Improvement & Upgradation of different facilities at Lengpui Airport' chu a vawi 5 nan an tlawh. MSPMC hian April ni 22, 2024 khan a hmasa ber atan endik hna hi an thawk a, June ni 6, 2024 khan a thawh hnihna atan endik lehin, June ni 26, 2024 leh October ni 4, 2024 ahte an lo endik tawh bawk a ni. He hunah hian MSPMC memberte bakah, PWD, PHED, P&ED, Aviation, DIPR, MJA leh CISF hotute an tel a ni. Contractor pahnih Pu Zoramchhana, Electric Veng, Aizawl leh KR Construction, Thuampui, Aizawl te chu Lengpui Airport cheithat hna thawk tura thlan an ni.

MSPMC hi Team A leh B ah inthenin Team A hian Lengpui Airport building leh a chheh vel civil works endik hna an thawk a, Team B hian electrical works leh sipai ho chenna barrack an endik thung a ni.

Endik hna an thawh zawh hnu hian Lengpui Airport departure floor (first floor) buildinga VIP lounge tura ruahman mekah inkawmhona nei lehin an endik hna thawh atanga an hmuhchhuahte thlirhona hun neih a ni a. MSPMC memberte chuan endik hna an thawh hmasak ber tuma an ngaihmawh leh vei zawng thil chi hrang hrang 19 an sawite bawhzui a nih kawngah thawktuten theihtawp an chhuah chu lawmawm an tih rualin duhkhawp lohna an neihte an tarlang a, works department aiawh officialte nen sawiho a ni.

MSPMC memberte’n an ngaihmawh chi hrang hrang an tarlan zingah 1st floor a central A/C (air conditioning) chawmtu generator thawm ring lutuk leh VIP lounge tura ruahman chhungah pawh ring taka inbiak a ngai chu an ngaihmawh thute, Lengpui Airport venghimtu sipaite riahna security barrack chungchangte, ceiling leh LED light eng thei lo tam lutuk chungchangte, departure ramp chungchangte leh thil dang engemawzat a tel a, report kimchang taka siam a nih tur thu an sawi bawk a ni.

MSPMC memberte chuan lehkha leh tawngka pawha hriattir an ni chunga he hna thawk tura thlan contractor pahnihte an rawn lang lo chu an ngai thutak hle tih an sawi a, hnathawh hun tlem avanga hna thawh chak loh chhan nia official ten an sawi CISF hovin zan dar 10 hnu lama hna thawh an phal lo leh an hnathawh duhna hmunah an duh huna hna an thawh theih loh chungchang chu works departmentte, aviation leh CISF chu dawhkan khat kila sawiho turin thurawn an pe a ni. 

Officialte hian departure floor (first floor) hi an siam zawh thawkhat tawh thu tarlangin November thla laihawl hian Ground floor (arrival floor tur) lama awmte leh an bungruate first floor lamah an suan chho ang a, ground floor siam that hna ngawrh zawka an thawh tur thu sawiin, January, 2027 ral hmain zawhfel hman an inbeisei tih an sawi a. Departure floor luhka khuhna tur Front Canopy pawh a satu tur thlan fel tawh a nih thu leh a hmanrua mamawhte chah mek a nih thu pawh tarlangin tluang taka an thawh theih chuan March, 2027 thla tawpah Airport cheithat hna zawhfel vek an inbeisei tih an sawi.

MSPMC Vice-Chairman Pu R. Lal Rinawma chuan vawi 4 an tlawh tawh thu leh an ngaihmawh an sawi tawhte pawh tih that a ni mumal lo tih a sawi a, hmasawnna an hmu tam lo tih a sawi bawk. Pu Rinawma hian hnathawh quality duhthu a sam lo chu pawi a tih thu sawiin, MSPMC anga an tih theih chin an ti tih a sawi a. State dangin thil an nei thain an nei changkang a, mipuiten min khaikhin dawn a ni a ti a. Lengpui Airport chu Mizoram hmel lanna ber pakhat a nih avangin hetianga hna thawh a nih chuan mipuite atanga sawiselna tawn tur a huhphurhawm dawna a hriat thu a sawi bawk a ni.

MSPMC memberte chuan contract agreement duan (draft) laiin uluk a pawimawh tih sawiin, hnathawh zawh tur hun bithliah mumal tak nena kan inkamki loh chuan a hnuah engemaw awm se invenna tur kan nei dawn lova, tha taka thawk tura kan duh chuan fimkhur leh uluk taka duan a pawimawh an ti a. Completion report pek chungchangah pawh fimkhur a pawimawh hle tih tarlangin, defect liability period chhungah uluk taka contractorte nen joint inspection neih ngei ngeia report mumal tak ziah a thehluh a pawimawh tih an sawi bawk a, completion report pek hmain ‘completion drawing’ phut ngei ngei tur a nih thu sawiin, hei hian emergency thil engemaw a awm a chhanchhuah hna thawh a tul hun a awmin security force te leh chhanchhuah hna thawktute rin tur ber a ni a, a tira drawing awmsa ang lova hna thawh a nih chuan a tawpa thawh zawh hnua a awm dan drawing felfai tak phut ngei ngei a pawimawh thu an sawi bawk.

Tun dinhmunah KR Construction hi completion certificate pek tawh a ni a, Zoramchhana erawh completion certificate pek a la ni lo.