Agriculture Minister Pu H. Liansailova chuan Mizoram-in buh kan thar chhuah zat kum khata thla hnih chauh tla anih rih avangin tan kan lak hle a ngai a ni a ti. he thu hi vawiina AMFU Kolasib Hqrs. tena Scientific Interaction programme AMFU Conference Hall, Kolasib Project venga an buatsaihnaa a sawi a ni. Kan buh thar chhuah a tlem avangin ram dang thar chhuahah kan in nghat nasa a, buh chauh ni lovin thlai dang zawng zawng hmarchapui thlengin pawn lam atanga chawk luh reng a ni a ti a. Nitina a loa kan awm theih loh heng buh leh thlai chin kawngah hian nasa taka tan kan lak chhoh a tul a ni, a ti.

Pu H. Liansailova chuan thlai thenkhat Sapthei leh Lakhuihthei etc. ah te kan thar tam tia a kan sawi pawh hi khawl hmanga sawngbawl tham an la awm chuang lova, chuvangin Mizoram siam tia ti chhuak ve tur chuan keini kut hnathawktute hian taima taka tih tak takna nena kan thawh a ngai a ni a ti.

Kolasib District chhungkaw hrang hrang atanga kut hnathawktu kalkhawmte chu sorkar-in an harsatna sutkian sak a duh a, AMFU Kolasib tena hetiang mithiamte rawn theihna hun a buatsaih chu hmang tangkai tura chahin an harsatna hriat chu sorkar finchhuahna a ni, Minister chuan a ti.

Pu H. Kaphranga, President, AMFU Kolasib District chuan inkhawm a kaihruai a. Pu R. Lalduhawma, President, AMFU Gen. Hqrs. pawhin hu sawiin, sorkar in ruahmanna tha leh khawng tak tak siam thin mahse a taka thawktu keini ho hi kan rinawm loh chuan Mizoram nakin hun tur chu a ngaihtuah awm hle ang a ti a. Taimakna leh rinawmna hi kan thupuiah i neih reng ang u, tiin kut hnathawktute chu a sawm a ni.

Scientific Interaction hun chawhnu lama neih hi Rev. Sikulfala, Adviser AMFU Kolasib District Hqrs. chuan a kaihruai a. Zawhna leh chhanna hun hman a niin zawhna te chu Kolasib KVK a Scientist te leh department hrang hrang mithiamten an chhangin an hrilhfiah a ni.