India hmarchhak State-te tan bika buatsaih, ni khat awh tur Zonal Conference for Rabi Inputs 2011-2012 chu vawiin khan State Guest House Conference Hall-ah neih a ni.
He Zonal Conference Pu Pankaj Kumar, Joint Secretary, Govt. of India, Ministry of Agriculture kaihhruaiah hian Ministry of Agriculture, Govt. of India atangin Officer rual 12 an lo tel a, India hmarchhak State hrang hrang Assam, Arunachal Pradesh, Nagaland, Manipur, Tripura, Sikkim, Meghalaya atanga Agriculture Department leh Corporation dang atangin Officer rual 22 an lo tel bawk.
Zonal Conference-ah hian kumin thlasik atana India hmarchhak State-te tana thlai chi mamawh chungchang te, leitihthatna fertilizers chungchang te, buh leh bal tharchhuah a lo pun theihna tura khawl lam mamawh te, thlai venhimna lam atana hmalakna tur te, Horticulture leh thlai kumhlun chin chungchanga hmalakna tur te, hemi atana mamawh hrang hrang leh hriatna thehdarhna hmanrua ‘Extension’ chungchangte uluk taka sawiho a ni. Fertilizer bikah hian India hmarchhak State tinte an mamawh zat theuh te chu IFFCO, Indian Potash Ltd.(IPL) leh Brahmaputra Valley Fertilizer Corporation Ltd. (BVFCL) ten a tul anga ngaihtuah sak turin hriattir an ni. Mizoram bik tan chuan tun dinhmuna Fertilizer kan mamawh zat pek tura ruahman a ni. Mizoram mamawh chu Silchar atanga phurh theih turin Company-te hriattir nghal an ni bawk.
He Zonal Conference-ah hian Mizoram aiawhin Agriculture Secretary, Pu T.V. Fambawl, MCS leh Agriculture Director, Dr. C. Lalzarliana te pawhin Mizoram Agriculture hmasawnna tur leh mamawh hrang hrang te an sawi chhuak a, Central atanga lo kalte hi nimin lam khan Agriculture hnuaia hmalakna Tlangram Terrace-a buh chinna te leh Oil Palm hmunte an enpui bawk.
