3910/2023-2024

2024 Ramtuk thla ni 21: Vawiin khan Kolasib District Task Force for Malaria Elimination chu an Chairman, District Bawrhsap Pu John LT Sanga hovin Kolasib DC Conference Hall-ah an ṭhu khawm a. Kolasib District chhunga sikserh (malaria) tirem tura hma lakna thlir hovin, hma lak zel dan tur an sawi ho.

Chairman Pu John LT Sanga chuan malaria chungchangah Kolasib District chu Mizorama a ziaawm ber pawl ni mah se, malaria vei an la awm ve zel avangin inthlahdul lova hma lak reng a ngai tih a sawi a. Natnain mi a tlakbuakin, a hun taka chet phat loh chuan a pawi hman ṭhin tiin, malaria um bo tura hma laknaah pawh thawktute leh mipuite'n a hun takah tih tur ṭulte ṭha taka tih zel a pawimawh, a ti a. Damna, hriselna leh dam reina te chu Pathian malsawmna a nih rualin keimahniin kan thawh chhuah a ngai tih sawiin, malaria awm lohna district ni tura ṭan la lehzual turin thawktute leh District mipuite a chah a ni.

Co-Chairman, Kolasib District Senior Chief Medical Officer Dr RK Lalthlamuana chuan kum kal ta leh kum kal meka malaria leh dengue chungchanga Kolasib District dinhmun tar langin, malaria chungchanga hriat tur pawimawh hrang hrang leh malaria um bona tura hmachhawp awmte a sawi fiah bawk a. Malaria um bo turin thosi pian theihna tui tling tihbo leh damdawia chiah thosilen zar ṭhat a pawimawh thu a sawi a. Natna lang chhuak lem lova malaria hrik pai, malaria pu darhtu (asymptomatic carrier) awm theih a nih avang leh malaria vanga tuarna leh thihna titlem turin thisen endiktir (test) uar a pawimawh thu sawiin, natna chungchangah hriat chhuah hma chu invenna ṭha ber a ni, a ti.

Vawiin ṭhut khawmah hian Kolasib District chhunga raltlan awmte a hlawma thisen endik kalpui dan tur ruahman ni se, tih a ni a. Ram riak ṭhin te, lirthei khalha hmun hrang hranga zin kual ṭhin te, thosilen zar mumal lova mu ṭhinte tan thisen endik ngaih pawimawh lehzual a ṭul thu pawh he hunah hian tar lan a ni.

Sr CMO report aṭanga a lan danin, Kolasib District chu Mizorama malaria tlemna (low endemic) district pali zinga pakhat a ni a. Kum 2022 chhung khan malaria vei leh vei loh endik 21,733 aṭangin malaria vei 22 hmuh niin, District chhunga mihring awm 23.21% endik ang a ni a; API (annual parasite incidence) anga chhutin mihring 1,000 zela mi 0.23-in malaria vei ang an ni. Kum 2023 chhung khan malaria vei leh vei loh endik 22,617 (24.02%) awm thungin, malaria vei 29 hmuh an ni a; mihring 1,000 zela mi 0.31-in malaria vei ang an ni. Kumin January thlaa Mizoram puma malaria case hmuh chhuah 545 zinga 1 chu Kolasib District-a mi niin, enkawl dam tawh a ni a; February thlaah Kolasib District-ah malaria case hmuh chhuah a la awm lo thung. Kum 2021 hnuah Kolasib District-ah malaria vanga thi an la awm lo va; District chhungah DDT kah ngaihna khua pakhat mah a awm lo bawk.

Kum 2023 chhung khan Kolasib District-a dengue vei rinhlelh thisen lak 215 aṭangin a vei hmuh chhuah 17 an awm a; thihpui erawh an awm lo thung.

Malaria um bo tura hma laknaah damdawia thosilen chiah duhte tan PHC-ah chiah theih tura ruahmanna kalpui reng niin, kum 2023 chhung khan Kolasib District-ah heti anga thosilen chiah hi 926 a awm a. Kum 2016 leh 2020-ah te khan damdawia chiah sa thosilen (LLIN) sem niin, kumin 2024-ah pawh hian sem leh tura ruahman a ni a. Kolasib District chhunga khua/veng 56 zinga kum 2018 - 2022 chhunga mihring 1,000 zela malaria vei 1 tal awm tlinna (above 1 API) khua/veng 24-ah LLIN (long lasting insecticide treated net) thosilen 22,865 sem theih beisei a ni.