2072/2026-2027

Kolasib, 4th September, 2026: Vawiin khan DC Conference Hall, Kolasib-ah Pu H Dolianbuaia, Kolasib District Election Officer kaihhruaiin Kolasib District chhunga Special Intensive Revision (SIR) of Electoral Roll, 2026 kalpui mek leh hmalaknate thlirhoin, political party, NGO, media leh Electoral Registration Officer (ERO) te an thukhawm.

He hunah hian District Election Officer chuan SIR kalpui dan leh Electoral Roll dik leh rintlak neih a nih theih nana verification leh endik hna kalpuite a tarlang a. Tarlan a nih danin, Kolasib District-ah hian Draft Electoral Roll-ah vote nei mi 61,340 an awm a. Form-6 leh Form-8 hmanga vote thun thar (inclusion) zawng zawng hi 1,869 a ni a. Form-7, DSE leh insawn (migration) avanga paih (deletion) zawng zawng hi 3,266 a ni thung. Hetiang a nih avang hian Final Electoral Roll-ah vote nei mi 59,943 an awm dawn a ni.

Assembly Constituency (AC) hrang hranga vote dinhmun chu hetiang hi a ni:

4-Tuirial (ST) AC: Draft-ah 17,719 awmin, Final E/Roll-ah 17,620 an awm a, mi 99 in an kiam a ni.

5-Kolasib (ST) AC: Draft-ah 22,952 awmin, Final E/Roll-ah 22,485 an awm a, mi 467 in an kiam a ni.

 6-Serlui (ST) AC: Draft-ah 20,669 awmin, Final E/Roll-ah 19,838 an awm a, mi 831 in an kiam a ni.

 District Total: Draft-ah 61,340 awmin, Final E/Roll-ah 59,943 an awm a, a pumpuiah mi 1,397 (2.277%) in an kiam a ni.

Meeting-ah hian vote nei thei awm reng hnutchhiah an awm loh nan leh vote nei thei lo thunluh an awm loh nana theih tawp chhuaha uluk taka verification leh cross-verification hna field level-a kalpui a nih thu tarlan a ni.

Political party hrang hrangte, NGO, media leh election official (ERO, BLO adt.) ten tha taka an thawhpui avangin he endik hna hi felfai leh langtlang  taka kalpui a ni tiin,  DEO chuan political party leh NGO aiawhte chu an ngaihdan leh rawtnate sawi tura sawmin, harsatna leh thil dik lo awmte chu dan leh kaihhruaina awmsa anga endik leh chinfel a nih tur thu a sawi bawk .