1440/2026-2027

Kolasib, 17th July, 2026: Vawiin khan Agriculture & Farmers' Welfare Department, Govt. of Mizoram buatsaihin 'State Level Mega Oil Palm Plantation Drive - 2026' chu Parish Hall, Venglai, Kolasib-ah neih a ni. He hun hi Agriculture & Farmers' Welfare Minister Pu P.C. Vanlalruata chuan khuallian niin a hmanpui a, Tuirial bialtu MLA Pu K. Laldawngliana chu khualzahawm a ni. He inkhawm hi Pi Ramdinliani, IAS, Secretary, Agriculture & Farmers' Welfare Department chuan a kaihruai a ni.

Khuallian Pu P.C. Vanlalruata chuan kalkhawmte chibai bukin lawmthu a sawi a. "Oil Palm chin theihna hmun zawng zawngah ching vek pawh ni ila, Mizoram leilung za zela pathum (3%) vel chauh a la ni dawn a ni," a ti. National Mission on Edible Oils - Oil Palm (NMEO-OP) hnuaiah central sawrkarin Oil Palm hmun nei tura min beiseina chu kan la pha lo hle a ni, a ti bawk. India ram chu hriak (edible oil) lamah intodelh a tum avangin, central sawrkarin duhsak takin mipuite hmasawn nan min kaihruai a ni tiin, Kolasib leh Mamit district-a Oil Palm chin theihna hmun zawng zawngah chin khah vek a nih theih nan tan lak a tul hle a ni, a ti.

Minister chuan Lunglei, Lawngtlai leh Siaha district-ah te pawh hmalakna kalpui chhoh mek a nih thu sawiin, Patanjali lam ten Lawngtlai district-ah khawl an bun mek a, an peih fel thuai beisei a nih thu a tarlang a. Sawrkarin loneitute khaichhuah nan hma a la nasa hle tih sawiin, a man (rate) hriat sa a thlai chin theihna tur ruahman in chu chu tihlawhtling turin hmalak mek a ni a ti. Oil palm chingtuten an thar chhuah an phurh chhuahna kawnga harsatna an tawh sutkian nan MDONER hnuaia NESIDS-Road sum hmangin Oil Palm Link Road km 32.70-a thui PCC pavement-a siam hna thawh mek a ni a. Hemi bakah hian NMEO-OP Scheme hnuaiah Rs. 840.44 lakh senna tur ruahmanna kalpui mek a ni bawk, a ti.

Oil Palm chin atanga hlawhtlinna chang loneitu thahnem tak an awm tawh thu leh, tunah phei chuan Cocoa nena chin kawp (intercropping) dan kalpui tum mek a nih avangin chingtu te tan a hlawkthlak lehzual dawn a ni, a ti. Khuallian hian loneitute phun tur Oil Palm tiak (seedlings) a vai liam nghal a, Oil Palm thehdarhna atana tangkai tur publicity materials a tlangzarh nghal bawk a ni.

Khualzahawm Pu K. Laldawngliana, MLA pawhin thu sawiin, thlai hralhna chiangsa Oil Palm hi kan intihhmuh a pawimawh hle a ni a ti a, kut hnathawktute chu rinawmna leh taimakna nena hma la turin a chah. "A hralhna (market) a awm sa a, a rah hun tur pawh thil chiang sa a ni a, ven hah lutuk a ngai lo. Oil Palm chin hi chu kan fate tana bank account hawn lawk ang deuh a ni," a ti. Hlawhtling tur chuan taimak a ngai a, chutih rualin rinawmna neih tel a ngai a ni, a ti bawk. Hemi rual hian Oil Palm chinna tur ram theh saktu Village Council te chungah lawmthu a sawi nghal a ni.

He hunah hian Kolasib District chhunga Oil Palm chingtu mi panga (5) hnenah lawmman pek an ni a. Kum 2025-2026 chhunga Oil Palm hralh hnem ber Pu Zomuansanga hnenah leh, ram neih dan teha thar hlawk ber Pi Lalnunthari hnenah lawmman hlan a ni. Hectare 5 aia tama hma la thar mi 3 - Pu C. Rothuamluaia, Pu J. Lalchhuanawma leh Pu Lalnuntluanga Fanai te hnenah lawmman pek an ni a. VC anga Oil Palm chin zauh (area expansion) kawnga hma la tha ber Thingdawl VC hnenah lawmman hi pek a ni bawk.

Report-a a lan danin Mizoram-ah ram hectare 7,260 a zauvah Oil Palm chin niin, district 8-ah kalpui mek a ni a, kum khat chhungin metric tonne 7,500 atanga 8,000 inkar thar chhuah thin a ni.

He hunah hian Pu B. Ramnunsanga, Addl. Director, Agriculture & Farmers' Welfare Dept., Pu Lalruatkima, Senior Executive, Godrej Agrovet Ltd. leh loneitu aiawh te hnen atangin thusawi ngaihthlak a ni bawk.