1439/2026-2027

Lunglei, 2026 Vawkhniahzawn thla ni 17: Lunglei Bazarveng khawtlangin 15th HPC Cup 2026-a Bazarveng LC Team an champion lawmna hun Govt Bazar High School Hall-a an buatsaih chu vawiin khan Lunglei West bialtu MLA Pu T. Lalhlimpuia chuan a hmanpui.

Bialtu MLA Pu T. Lalhlimpuia chuan Bazarveng chu football tuipui leh thiam veng an ni ṭhin tih sawiin, HPC Cup champion an ni chu a lawmpui tak zet tih a sawi a. Champion theihna chu player-te thawh rimna leh team enkawltute ṭhahnem ngaihna te, LC, NGO leh mipuite ṭan rualna zar a nih thu sawiin, hlawhtling tura pawimawh thawh rimna leh thawh hona ṭha a taka lantirtu player-te leh veng mipuite'n champion an phu hlea a hriat thu a sawi a. HPC Cup champion chu veng inelnaah veng bila hlawhtlinna a nih rualin, veng chhungah tawp lo se, Lunglei, Mizoram leh India ram tan thlenga hlawhtlinna kailawn leh ṭan petu ni se a duh thu a sawi.

Pu T. Lalhlimpuia chuan Bialtu MLA a nih anga ram leh khawtlang tana hma lakna an kalpui mekah kawng chu hmasawnna atana pawimawh ber pakhat a nih angin a ngaih pawimawh thu leh rawtna (proposal) a theh luh tam ber a ni thu sawiin, Bazarveng chhunga inkal pawhna kawng hrang hrang pawh a tahtawlin siam ṭhat chhoh zel beisei a nih thu a sawi a. Bazarveng Market Shed hawn fel theih a ni ta te, cheng vaibelchhe 2 chuanga Recreation Hall sak ṭhatna tur pawm a ni leh hna ṭan theih thuai a ni tur te chu lawmawm a tih thu sawiin, NGO hrang hrangte nen thawh hona tha tak nei a, NGO-te mamawh a theih ang anga ngaihtuahpui leh tihhlawhtlin theih a ni ṭhin chu lawmawm a tih thu a sawi bawk a. Khawtlang leh ram hmasawn nan zirna a ngaih pawimawh thu sawiin, Lungleiin zirnaah hma a sawn theih nan Tlanglian Academy te nen inremna ziakin, mi 20 tan thla 3 chhung online coaching kalpui tum a nih thu a sawi a. MLA hmingin Lunglei West bial chhunga class 10 aṭanga PhD-a hlawhtlinna changte lawmpuina an pek ṭhin thu sawiin, zirna kawnga hmasawnna a awm theih nan theih tawp chhuaha hma lak zel a tum thu a sawi.

He hunah hian Pu T. Lalhlimpuia chuan Mizoram University (MZU) Under Graduate Examination 2026-a Bachelor of Arts (Philosophy)-a Mizoram puma parukna Lalhriatpuii Ngente d/o Laldingliana Ngente (Bazarveng, Lunglei) hnenah lawmpuina thuziak leh laptop a hlan nghal a. Zirlai ti ṭha lawmpuina inhlan ṭhin chu a ṭha zawnga zirlaite cho phurtu atana buatsaih ṭhin a nih thu a sawi.

He hun hmanpuitu dang Lunglei Municipal Council (LMC) Chairman & Ward No. III Councillor Pu Lalzuithanga chuan HPC Cup khelh zawh takah Bazarveng LC team player-te leh team enkawltute an fakawmin, an thawh hona a ṭha a, champion pawh an phu hlea a hriat thu sawiin, khawtlang mipuite'n an thlawpna chu ropui a tih thu a sawi a. Champion nihna chu thawh rimna leh lung rualna aṭanga hlawh chhuah a nih avangin hlu a tih thu sawiin, khawtlang mipuite pawhin inlung rualna, inunauna leh khawtlang hmasawnna kawnga ṭhahnem ngaihna petu atan hmang zel se a duh thu a sawi.

Champion lawmna inkhawm hi Bazarveng Local Council (LC) Chairman Pu C. Biakthankima'n a kaihruai a. PCI Bazarveng bialtu pastor Rev. Michael Lalchhuanawma'n hunserh hmangin, MHIP Bazarveng Branch Zaipawl te'n hla an rem a. Lunglei District Football Association (LDFA) ai awh thu sawi leh Bazarveng LC Team report ngaihthlak niin, LDFA hian champion lawmpui nan Bazarveng Team kutah hian football an hlan bawk.

He hunah hian LC Treasurer Pi LH Zosangpuii kaihhruaiin Bazarveng LC Team player leh team enkawltute chawimawina hun hman a ni a. LC Vice Chairman Pu C. Vanrosanga'n lawm thu sawiin hun a khar a. Khawtlang huapa champion lawmna ruai buatsaih chu kil ho nghal a ni.

15th HPC Cup 2026 hi May ni 16 aṭanga June ni 26, 2026 chhung khan C. Ṭhuamluaia Mual, Lungleiah khelh niin, Men's Team 29 tel zingah Bazarveng LC Team hi an champion a. Champion lawm nan hian Celebration Committee din niin, Bialtu MLA Pu T. Lalhlimpuia'n sial pakhat thawhin, Bialtu Councillor Pu Lalzuithanga, Local Council leh mi ṭhahnem ngaite thawh khawm aṭangin sial pakhat lei belh a ni bawk.