1438/2026-2027

Lunglei, 2026 Vawkhniahzawn thla ni 17: Mizoram Bana Kaih (Handholding) Scheme hnuaia Mizoram District Transformation Programme (MDTP) kal tlanga Lunglei District-a hriselna kaihhnawih hma laknaa hman atana Bolero Camper pahnih lei thar chu vawiin khan Lunglei District Bawrhsap Pi Navneet Mann chuan Lunglei District Senior Chief Medical Office kutah a hlan.

Bolero Camper inhlan puala Bawrhsap Pisaa hun buatsaihah Bawrhsap Pi Navneet Mann chuan Mizoram Sawrkar flagship programme Bana Kaih (Handholding) Scheme hnuaia kalpui MDTP kal tlangin District tinah hmasawnna thar leh chhawr theih project hrang hrang tihhlawhtlin nan Deputy Commissioner-te kutah sum dah a nih thu sawiin, MDTP hnuaiah hian Lunglei District-ah department hrang hrang aṭanga rawtna lut project sawm vel kalpui mek a nih thu a sawi a. June 2026-a Urban Development & Poverty Alleviation Department hnuaia chhim lama 3R Centre hmasa ber hawn chu MDTP hnuaia project hmasa ber a nih thu sawiin, mipuite pawhin an chhawr ṭangkai thu a sawi a. MDTP kal tlang hian Fisheries Department pawhin sangha khawi chungchang inzirtirna project an kalpui mek thu sawiin, tunah health department tan lirthei thar lei leh inhlan theih a ni leh ta chu lawmawm a tih thu a sawi.

Bawrhsap chuan Lunglei District-ah health department-in lirthei an mamawhna a san thu leh Mobile Medical Unit (MMU) leh hriselna kaihhnawih danga hman tur lirthei mamawhna an thlen ṭhin pawh tihhlawhtlin theih a nih loh reng laiin, tunah Bana Kaih (Handholding) Scheme kal tlanga chu'ng mamawh phuhrukna tur tihhlawhtlin theih a ni ta chu lawmawm a tih thu sawiin, Chief Minister Office leh Planning Department hnenah lawm thu a sawi a. Lirthei thar chuan vaccine semna leh hriselna hna thawhna (health service) hrang hrangah nasa takin a pui dawn tih sawiin, Lunglei khawpui mai bakah, thingtlang hmun hla zawkte tan pawh hriselna lama hmasawnna hmanraw pawimawh tak a nih tur thu a sawi.

Lungsen PHC tana motor pek thar chu Project BLOOM hnuaia "SafeWombWheels" kalpui mekah pawh ṭangkai taka hman a nih a beisei thu sawiin, PHC-in motor hran a neih loh avangin nu nau pai damdawi ina nau nei turte chu CSR kal tlangin NHIDCL ṭanpuinain hun eng emaw chen kalpui a nih hnuah tunah chumi atana hman tur lirthei a awm thei tur chu hmasawnna lawmawm tak a nih thu a sawi a. Lirthei thar chu nu nau paite nau nei tura a hun taka damdawi ina hruai theihna tur a nih dawn bakah, hriselna kawnga pawimawh leg rikrum thil dangah pawh ṭangkai taka hman theih a ni dawn tih a sawi a. Lirtheite chu uluk taka enkawl a, ṭangkai taka hmang turin thawktute chahin, lirthei thar inpek chu project hlawhtling tak a nih theih nan theih tawp chhuah turin a chah a. Sawrkar kum kal mek leh kum tharah pawh MDTP hnuaiah hmasawnna hna thawhna tur project thar ṭha tak tak kalpui chhunzawm zel theih a nih a beisei thu a sawi.

He hunah hian DC Office leh Health Department official-te, Bana Kaih line department official-te an tel a. Lunglei District Senior Chief Medical Officer (SCMO) Dr Lalrinthangi chuan sawrkar leh Bawrhsap duhsakna zara Health Department-in lirthei thar ṭha tak pahnih an neih belh tur chu lawmawm an tih thu sawiin, hriselna kawnga hmasawnna a awm theih nan a ṭangkai thei ang bera hman a nih tur thu a sawi.

Hemi hnu hian Bawrhsap Pi Navneet Mann leh Additional Deputy Commissioner Pi Zoramdini te chuan lirthei chabi leh lehkha pawimawhte chu SCMO Dr Lalrinthangi kutah an hlan nghal a ni.

Bolero Camper thar pahnih lei nan hian Bana Kaih hnuaia Mizoram District Transformation Programme (MDTP) kal tlangin Lunglei District Catalytic Fund aṭangin cheng nuai 21 dah a ni a. Lirthei lei tharte hi pakhat zawk chu District chhung hmun hrang hranga vaccine leh bungraw pawimawh phurh kual nan SCMO Office Lungleiah dah a ni ang a, pakhat zawk chu Aspirational Block Lungsena Primary Health Centre (PHC)-a hriselna kaihhnawih ṭul hrang hranga hman a tan dah a ni thung ang.