State Agricultural management & Extension Training Institute  (SAMETI) huaihawt in vawiin khan Kolasib DAO Conference hall ah hlawk zawk leh tlo zawka ran vulh inzirtirna hun hman a ni.

Training hawngtu Pu J Rothanga DAO chuan ni thum awh tur awmze nei zawka ran vulh dan inzirtirna hun remchang a awm chu thil lawmawm tak a ni tiin hlawkpui tum theuh turin kalkhawm te a chah a. Pathian in ram hrang hrang leilunga malsawmna a dah te a inang loa Mizoram ah chuan boruak nuam leh ngaw tha min pe a hei hi thlai leh thei bakah ran te pawhin an ngeih duh a, kan ram mila zirin hma kan lak thiam a ngai ani a ti. Chutih laiin kawng hrang hrangin eizawnna kawng dap thin mah ila a bik takin buh leh bal tharchhuah chungchangah kan intodelh lo em em a State pawn atangin thil chi hrang hrang kan la lut nasa si a hemi avang hian Mizoram a sum vir vel tur chu State dangah nasa takin a luangchhuak a, hei hian a tlahniam zawngin State economy ah nghawng a nei a ni tiin lakluh ringawt nilo thawnchhuah lamah rilru kan sen a hun tawh ani a ti.

Sawthing thar leh hralh chhuah chungchangah hmalakna tha tak a awm chho meka chutih laiin Buh leh bal ani emaw ran vulh chungchang ah pawh nise kan State mamawh khawp pawh kan la tharchhuak loa, local market mamawh khawp tal kan tharchhuah a hun tawh takzet ani tiin ran vulh ani emaw, thlai leh thei rah tharchhuah na kawnga kan hmalakna chu dinchhuahpui tham eizawnna tlaka kan hman thiam a ngai a, Ram chhung ei leh bara inrelbawlna kawngah pawh a hlawk zawnga nghawng a neih theihnan training chu hlawkpui taka an chhawr theihnan duhsakna a hlan a ni.

Training hi June ni 14 thleng awh tur ani a, Kolasib District huam chhunga khaw pahnih atangin Ran vulh mi 30 vel koh an ni a, hlawk zawka ran vulh dan, Ran tharchhuah ina economy a nghawng dan, tlo zawk leh awmze nei zawka ran vulh dan bakah harsatna awm thin kawng hrang hrang chunchangah te training pek an ni anga, Agriculture Technology Management Agency (ATMA) lama mithiam Dr.V Zodinsanga, Dr Benjamin Lalduhawma leh Dr.Lalawmpuia ten zirtirna an pe dawn ani.

Attachment

  • Loading attachment...