Election Commission of India hnuaia khua leh tui kum 18 tling tawh Electoral Roll-a inziak lut lo te puala Special Drive neih mekah, nimin khan Diakkawn YMA Hall, Kolasib ah District Bawrhsap Dr. Arun.T. IAS chu khuallian niin he hun hi a hmanpui.
DC chuan, ‘kan ram roreltu leh hruaitu tur mi tha thlan chhuahna atan vote thlak hi hmanruah ah hmang ang u’ a ti a, roll-a in ziahluh chu mi pangngaite mawhphurna a nih thu leh India mi tupawh roll-ah a inziahluh theih thu a sawi. Nimin zing dar 10:00 khan Kolasib khaw chhunga High School, Higher Secondary School, DIET leh College zirlaiten an School/Institution theuh atangin Placard/Slogan nen kawng zawhin vote neih pawimawhna leh electoral roll-a inziah luh ngei a nih theihna turin campaing an nei a. He Street Walk-a tel te hi Kolasib khaw chhunga BLO-te leh Campus Ambassador-ten an School/Institution atangin programme hmanna Diakkawn YMA Hall thleng an telpui a ni.
He hunah hian Elocution Competition for High School leh Higher Secondary School tan neih a ni a. School tin aiawhin participant pakhat zel an awm a. Thupui ‘Vote neih hlutna’ tih a ni a. College leh DIET zirlaite tan Debate Competition buatsaih a ni bawk a. Thupui ‘Vote neih chuan thlak ngei hi kan bat a ni’ tih a ni bawk.
