Vawiin khan Government Kolasib College Multipurpose Hall ah The Mizoram Right To Public Service Act, 2015 chungchangah inzirtirna neih a ni a, Pu Lalnunhlua, Associate Professor, GKC chu khuallian niin he hun hi a hmanpui.

Khuallian chuan Dan leh hrai a awareness kan neih that tawk thin loh avangin mipuiten kan chanvo tur tamtak te hi kan hriatloh phah a, Democracy ah chuan mipui chanvo hi a pawimawh em em a, Sawrkar pawh in ruahmanna hrang hrang a siam thin a, heng ruahmanna hnuaia kan chanvo bakah khua leh tui kan nih anga kan mawhphurna te hlen chhuak turin kan in chhiar zau peih a kan inhrilh zau zel angai ani tiin The Mizoram Right to Public Services Act, 2015 Seminar chhim tura kalkhawm te chu hlawkpui theuh turin duhsakna a hlan bawk a ni.

The Mizoram Right to Public Services Act, 2015 chungchang hi Pu Collin Hlychho, DIPRO, Kolasib chuan Power Point Presentation hmangin zirtirna a pe a, The Mizoram Right to Public Services Act, 2015 hi December ni 1, 2015 khan hman tan ani a, He Dan hian Mizoram pum pui a huam tih a tarlang a (mahse Sixth Schedule hnuaia Autonomous District Council ten he dan hi an adopt loh chuan a huam chuang lo a ni).

He Dan ina a tum ber chu sawrkar in mipui te hnena “service” a pek chhuah thin te chu hunbi tiam chhunga a diltu hnena pek chhuah zat zat ani a, Sawrkar in mipuite hnena “service” a pek thinah tul lova tihkhawtlai a awm fo thin a, Service diltute hnena danin a phut ang ni lo “pawisa” lo dil tlat te a awm zauh zauh bawk a, Mipuite mamawh rang taka ngaihtuah zung zung thei sawrkar (responsive administration) kan neih theih nan a duan a ni.

He dan ina a huam te chu
a) Sawrkar hnathawk nghet te 
b) Hmun dang atanga sawrkar hnathawk a hawh lailawk te (eg: Deputation)
c) Tualchhung sawrkar a hnathawk te
d) Sawrkar in sum leh paia a tuamhlawm pawl a hnathawktute a huam vek ani

The Mizoram Right to Public Services Act, 2015 hnuaia “service” dah/sengluh tawh hi tun dinhmun ah 46 a awm mek a, Chung service neitu Department te chu:

Transport 2) Taxation 3) Social Welfare 4) Rural Development 5) Finance leh 6) PHE te an ni a, heng Department te hian an mahni Office ah an Service pek theih leh a hun bituk te chu mipui hmuh theih in an tarlang tur a ni a, Right to Public Service hi tun dinhmunah India ram State 18 ah hman mek a nih thu Seminar ah hian tarlan bawk a ni.

Mipuiten a zau thei ang bera an hriat theihnan Mizoram hmun hrang hrang ah he dan chungchang hi inzirtirna kalpui chho mek zel ani a, He dan hnuaiah hian Sawrkar ina mipuite hnena ‘Service’ a pek dana lungawilo te tan lungawi lohna thlenna tur First Appellate Authority leh Second Appellate Authority an awm a, First Appellate Authority chuan Designated Officer in chhan leh vang mumal tak awm lova miin ‘service’ a dil chu  hunbi tiam chhunga pe lovin a lo tikhawtlai nia a hriat chuan hunbi tiam ral hnu atanga a pek chhuah hma zawng nitin Rs. 250 a chawitir thei a, Rs. 5000 thleng chawitir theih ani. Second Appellate Authority chuan First Appellate Authority in chhan leh vang mumal awm lovin lungawilohna a hnena thlen chu hun tiam chhunga a  rem lohvin Rs. 500 atanga  Rs. 5000 thleng a chawitir thei bawk a, pawisa chawi tir bakah hian Sawrkar hnathawk chungah Disciplinary Action lak theih ani bawk.

He hunah hian Kolasib District MJA, Sub Hqrs YMA, Sub Hqrs MUP, Sub Hqrs MHIP hruaitute leh veng hrang hrang khawtlang hruaitute bakah Government Kolasib College zirlai thahnem tak an kalkhawm a ni.