Kolasib-ah Internet kaltlanga tui bill pek theihna tur Online Bill Payment chu mipui te hman theih turin vawiin khan District Bawrhsap Dr. Arun T.,IAS chuan DC Conference Hall-ah a tlangzarh. 

Dr. Arun T. chuan Aizawl tih loah chuan Kolasib chu district a online payment hmang hmasa ber tur a nih thu sawiin, PHE Department te hmalakna fakawma tih thu a sawi a. Tui Bill pe tura tha sen hah ngai lovin mahni inchhung atangin awlsam takin a pek theih tawh dawn a ni tiin, mipui ten a awlsam zawkna hrethiama tangkai taka hmang turin a chah a ni. 

Online bill payment tlangzarhna inkhawm hi Pu H.Lallianmawia, Sr.E.E, PHED Kolasib WATSON Division in kaihruaiin, Pu Alan Lalhriatpuia, System Administrator, MSeGS in online a bill pek dan tur kimchang a sawi a. 

Online bill payment hmanga Tui bill pe duhte chuan phebilling.mizoram.gov.in –ah lutin, district-ah Kolasib thlangin consumer number chhutluh a tui bill hi pek theih a ni tawh ang a. Tui bill pe tih chhinchhiahna (receipt) chu email chhut luhah thawn thin a ni ang. Tui bill pek a nih hian net banking hmangtute chuan tui bill Rs.500 chin hnuailamah chuan transaction tinah Rs. 5/- service tax (gateway fee) an chawi ang a, Rs.500/- aia tamah erawh chuan Rs.7/- service tax an chawi thung ang. Credit card hmangtute’n transaction khatah an bill pek zat 1% service tax an chawi ang. Debit Card hmangtute chuan tui bill Rs.2000/- chin hnuailamah transaction tinah 0.75% service tax an chawi ang a, Rs.2000/- aia sangah 1% service tax an chawi ang. Mobile wallet hmangtute chuan transaction tinah Rs.5/- service tax an chawi anga. Transaction fee (gateway fee) chawi atang hian GST 18% pek tur a ni bawk ang. Hemi awmzia chu Net banking hmanga tui bill pek chuan tui bill pangngai bakah Rs.5.90/- pek belh a ngai dawn tihna  ni. Tui bill hi online payment hmang hian bill pek theih hunchhungin engtik darkarah pawh pek theih a ni a (24hrs), bill pek theih tawp ni-ah khar thin a ni ang. A tihdan tur hrechiang duh tan PHE office, Kolasib -ah office hunchhungin zawhfiah theih reng a ni.