Vawiin hian Serchhip DC Conference Hall ah Mizoram sawrkar flagship programme thar, New Economic Development Policy peng pawimawh tak Entreprenuership Development Scheme (EDS) hnuaia hmalakna inzirtirna leh Business Plan Contest 2017 kalpui mek chanchin inhrilhfiahna hun, NEDP Outreach Programme hman a ni. 

He hun hi Serchhip Addl. DC thar Pu Chuauhnuna, MCS in kaihruaiin Pu R. Lalhmingthanga, Associate Professor, Master Trainer EDS leh Indian Institute of Management Calcutta Innovation Park mithiam Pi Zorammawii Ralte ten zirtirna hun an hmang. Pu Lalhmingthanga hian, Entreprenuer chungchang kalkhawmte zirtirin tunlai khawvelah sumdawnna te, Service chi hrang hrang te, thilsiam chhuahna leh tharchhuahna kawng engkimah; mi tharchhuah sa hmang raltu ni ngawt lova a thar chhuaktu, a siam chhuaktu kan nih ve loh chuan ram hmakhua a ngaihtuahawm a. Chu chu hriain Mizoram sawrkar chuan, kan thalai, khua leh tui tupawh tharchhuaktu, thawkchhuaktu nih theihna kawng hria, sumdawnna hlawhtling ngei tur ruahmanna siam thiam te tan EDS hmangin kawng a hawng a. He hmalakna chhawr tangkaitu nih tuma bei turin Serchhip District mipuite kan sawm a ni, a ti a. Hlawhtling tura kawng harsa paltlang dan leh beidawng lova beih zel a tul zia ngaihnawm takin a zirtir bawk.

He mi hnu hian Pi Zorammawii Ralte, IIMC (IP) mithiamin EDS hnuaia Mizoram pum huap Business Plan Contest (Mizoram Kailawn) 2017 kalpui mek dan sawifiahna neiin, heta tel duh leh ruahmanna thehlut ve duh tan www.mizoramkailawn.org emaw www.mizoramkailawn.com ah in register-a online hmang veka thehluh theih a nih thu a sawi a. Thil hriatchian duh nei tan he website ah tho hian anmahni biakpawhna (contact) a awm thute, engtiklai pawha an biakpawh reng theih thute a sawi bawk. Hemi hnu hian kalkhawm ten zawh duh leh hriatchian duh an neih apiangte zawhna hun an hmang a ni.

Vawiina programme ah hian zirlai naupangte, Serchhip a sumdawng hrang hrangte, khawtlang hruaitute, official pawimawh te, chanchibumite leh Business Plan Contest a tel tum mi thenkhatte an tel a ni.