Nimin zing khan Kolasib atanga Pathianni-a chanchinbu tih chhuah hmasak ber Turnipui Sunday Post chu Kolasib DIPRO Pi Lallianpuii’n MJA Office, Project Vengah a tlangzarh.

Tlangzarh paha thu sawiin Pi Lallianpuii chuan Turnipui Sunday post chhuak tur chu District tana hmasawnna chhinchhiah tlak tak a ni, a ti a. Media te chu ram rorelnaah pawh the Fourth Estate ti hiala hriat, hmun pawimawh tak luahtu an nih avangin an pawimawh zia inhre thar turin a chah a. Chanchinbu thar buatsaihtute chu theihtawp chhuaha tang mar pat turin a chah a ni.

Pu S. Lalrinawma, Joint Editor, Turnipui chuan tlangzarhna inkhawm hi a kaihruai a. Pu S. Lalhmachhuana, President MJA chuan lawmthu sawi tawngtaina hun hmangin Pu Andrew Vanlalauva, V President MJA in thu a sawi bawk.

Turnipui Sunday Post hi phek 8 niin thalai leh upate chhiar duhzawng inpawlha siam a ni a. Pathianni apianga tichhuakin District pum huapa thu lawrkhawm thin tum a ni.