Vawiin chawhma dar 11.00 atang khan ni khat awh turin Diakkawn YMA Hall-ah Urban Development & Poverty Alleviation (UD&PA) Department hnuaia Technical Cell huaihawtin Rajiv Awas Yojana (RAY) zirchianna hun hman a ni a; hetah hian Kolasib leh Thingdawl khawchhunga tlawmngai pawl te leh VC-te an tel a ni.
He hun hmanpuitu Kolasib DC, Pu Jitender Yadav, IAS chuan “RAY hmang hian mirethei bakberh (slum area) chenna bial bikte chu tihhmasawn a, nunphung pangngai taka an nun a, khawpuia cheng dangte ang bawka an nitin nuna remchanna turte siamsak an ni dawn a. RAY-in mirethei zawkte dikna leh chanvo tungding a, khawtlang hmasawnna tura mawhphurhna la thei tura chher chhuah a tum hi a lawmawm tak meuh a ni” a ti a. RAY chungchang zirho tura kal khawmte chu mithiamte zirtirna uluk taka ngaithla a, an hriatfiah duh apiangte inthlahrung lova zawt turin a chah a. “RAY hlawhtlinna tur chu kan zavaia inpekna leh tanrualnaah a innghat a ni” Pu Jitender Yadav chuan a ti.
Rajiv Awas Yojana (RAY) hi kum September, 2011 atang khan Central sawrkarin a kalpui tan a; a thiltum lian zingah, mirethei chhungkua, chenna nei lo zawng zawngte tana kum 2020 ral hmaa in dinsak vek leh slum area tihbo te a tel a ni. Central sawrkar chuan chhungkaw pakhat tan insakna senso cheng nuai 5 zel a bithliah a; mahse, he pawisa atang hian zaa 25 chu vantlang tana thil tangkai tur dinna atan pawhpen tura ruahman tel a ni. Mizoram bikah chuan Central sawrkarin khawpui chhung Veng hrang hranga mirethei, chenna in leh lo chhe zual, chhungkaw 10 atanga 15 awm bingna chu ‘Slum Pocket’ tia puan a phal a, a Veng pum a huam tihna a ni lo a ni. Heng hmunah te hian RAY hnuaiah hmasawnna peng hrang hrang – tui thianghlim pek te, inkalpawhna kawng siam te, electric eng pek te, sub-centre leh zirna in din te kalpui a ni dawn a ni.
UD&PA Technical Cell hian ni 27-28.8.2014 chhung hian Kolasib leh Thingdawl khawchhunga VC area hrang hrangte fangin, ‘Slum Pocket Survey’ an nei nghal dawn a; hemi behchhan hian hmalakna lian tham atan Detail Project report (DPR) an la siam leh dawn a ni.
