Tukin zing khan Pu Zodintluanga, Minister of Sports, PHE,etc. leh Pu Lal Thanzara, Minister of State, PWD, Heath & Family Welfare etc,.te chuan Mualpui a Rajiv Gandhi Stadium an tlawh a. Gallery sak mek te endik in chak zawka hna kalpui a nih theih dan tur ruahmanna te an siam a ni. Rajiv Gandhi Stadium hi Rs. 8,09,92,306/ senga sak tura ruahman a ni a. A sak hna hi M/S Lloyd Insulation(India)Ltd. in September, 2013 atang khan thawk tan in September, 2015 ah chuan an thawk zo fel hman tawh tura chhut a ni.

Rajiv Gandhi Stadium chhunga Astro Turf Ground leh running track te hian hmangtu an neih reng avangin Stadium chhunga gallery sak hna thawh mek a ti buai thin niin Stadium sak hna viltu PWD Official te chuan an sawi a. Insakna hnathawhna hmun ah te inkhel entute an kal ve thin chu a him loh bakah insatu-te hnathawh a ti khaihlak a ni an ti. Minister te hian inkhelh duh te tan he stadium ground leh running track peihfel tawh leh hman lai mek chu hman chhunzawm theih zel tha an ti a. Hemi chungchang ah hian PWD chuan Ground chhung chu inkhel entute thutna tlar 7 chin atanga hung hranga Sports Department enkawltir lailawk a rawt a. Ruahman dan chuan stadium hmangtute chu Gate pui ber veilama Gate awmsa atanga luhtir tum a ni a, zunram thiarna tur pawh hun engemaw ti chhung atana hman theih tur chi siam a ni dawn bawk a ni. Minister pahnih te hian Rajiv Gandhi Stadium sira sak mek, Multi Purpose Indoor Hall an tlawh nghal bawk a ni.

Sports Secretary Pu Zothankhuma, PWD (Building) Chief Engineer Pu C. Lalrinawma leh sawrkar mipawimawh ten Sports Minister Pu Zodintluanga leh PWD Minister Pu Lal Thanzara te hi an tawiawm a ni.