Naupang ten vaihlo, zuk leh hmuam thatloh zia hria a, a laka an fihlim theih nana beihpui thlakna chu vawiin khan Kolasib Bawrhsap Pu Zoengsanga’n Kolasib Diakkawn YMA Hall ah a hawng.

Pu Zoengsanga chuan vaihlo, zuk leh hmuam chu mihring taksa tan mai bakah rilru thlenga nghawng theitu an nih avangin tiloh chu a him ber ani tiin lehkha zirlai tan phei chuan rilru chaklohna thlentu anih avangin a laka fihlim turin zirlai kalkhawm te a chah a. Pathianin mihring taksa chu thianghlim taka vawng turin a duang ani tiin Pathian, nu leh pa leh zirtirtute thu awiha mihring tana tur hlauhawm laka fihlimin nunkawng dik leh nunkawng hrisel zawh turin zirlai kalkhawm te chu a fuih a, chu chu hlawhtlinna thuruk pawimawh tak ani ati.

He hunah hian Pu ZT.Vawra Hmar, District Consultant, National Tobacco Control programme (NTCP) chuan vaihlo, zuk leh hmuam laka beihpui thlakna tura kawng hrang hranga ruahmanna an siam te tarlangin, Upper primary School hrang hrangah vaihlo, zuk leh hmuam hrisel lohna leh a laka fihlim pawimawh zia te chu zirtirna an pe anga, hemi bakah hian khawtlang hruaitu, health worker leh zirtirtu te tan pawh training buatsaih a nih tur thu tarlang bawkin Kolasib khawpui huam chhung bakah vairengte leh kawnpui Sub-Division ah pawh beihpui thlak a nih tur thu a sawi a ni.

Dr.C.Vanlalhlimpuia, District Nodal officer, NTCP chuan kalkhawm te hnenah vaihlo, zuk leh hmuam laka beihpui thlak pawimawh zia bakah mihring hriselna a nghawng dan chungchangah te zirtirna a pe a, Nula T.Ramthanmawii, Miss Mizoram 2018 chuan Ambassador niin he hun hi a hmanpuia, Kolasib khaw chhunga zirlai sikul naupang bakah Sawrkar hnathawkte leh khawtlang hruaitute an kalkhawm a ni.