October 21 hi India ram pumah ‘Police Commemoration Day’ atana hman thin a ni a. India ram chhunga awm Aksai Chin pel a ralthuam famkim nen a rawn lut ru China sipai rualte chuan mahni ram venghim tura hnathawk (duty) mek India Police te chu Hot Springs (Ladakh) ah October Ni 21 Kum 1959 khan an lambun a, Police huaisen tak tak sawm (10) lai mai in nunna hlu tak an chan phah a ni. He ni hi Police ram tana nun pe te hriatrengna ‘Commemoration Day’ atan India Sawrkar chuan puangin ram pumpuiah kum tin hman turin a rel a ni. Hemi ni zing hian India ram State Capital-ah leh District Headquarters-ahte Commemoration Day Parade neih a ni thin a, India ram puma Police duty laia thi te hming chhiarchhuakin anmahni hriatrengna leh sunna urhsun taka hman a ni thin.
India ram State hrang hrangah ni 1.9.2018 atanga ni 31.8.2019 chhunga thi te hi an vaiin mi 292 an ni a. Kumin chhung hian vanneihthlak takin Mizoram Police zingah duty laia thi an awmlo a ni.
Mizoram-ah pawh October Ni 21 zing Dar 7-ah hian Aizawl leh District Headquarters-ah te Commemoration Day Parade hi neih a ni a. Aizawl-ah chuan DGP Pu SBK Singh IPS hova hman a ni a. India ram hmun hrang hrangah Police, ni 1.9.2018 atanga ni 31.8.2019 chhunga duty laia nunna chan mi 292 te hming chhiarchhuakin urhsun taka Police thi te sunna neih a ni. District Headquarters leh Battalion Headquarters- ah pawh urhsun taka he hun hi hman a ni bawk.
Hemi hnu hian Mizoram Police, duty laia hmelma kut tuara thi tawhte hriatrengna ‘Martar Thlan’ 1st Bn. MAP Headquarters-a siamah DGP leh Police Officer dang ten pangpar an dah bawk a ni.
Police Commemoration Day hmanna pui ber National Police Memorial, Chanakyapuri, New Delhi-ah Mizoram Police aiawh in Flag Bearers- H/C Lalsangmawia leh Const. R.Lalnunpuia te an tel a ni.
