Vawiin khan DIPRO Conference Hall, Kolasib ah District AH & Vety Office chuan Kolasib District chhunga vawk vulhtute tan nikhat awh Training 'Hlawk zawka vawkpui vulh dan leh Vawk Kahrai (Artificial Insemination in Pig)' an buatsaih a.

Dr. C.Lalrintluanga, District AH & Vety, Officer, Kolasib chuan he Training hi kaihruaiin Kolasib District hi tun dinhmunah chuan Vawksaah leh vawk note-ah kan in todelh mai ni lovin District pawnah hralh chhuah reng a ni a ti a. Vawk note phei chu tualchhungah hralhna a awm meuh loh avangin Vawk vulhtuten duh aia tam an khawi/vulh nual thu a sawi a, hei hian hma kan sawn zia tarlangin tun dinhmunah hralh harsa deuh mahse, hmundangah hralhchhuahna a awm reng avangin he harsatna hi a ziaawm thuai a beisei thu a sawi a, Vawkpui vulh hi eizawnna tling/tlak a nih avangin uar deuh deuhva, District dangte tih hmuhtu ni zel turin a fuih a. Kolasib District ah hian Vawkpui 5 aia tam vulh chhungkua 50 aia tam leh 2/3 vulh mek chu Survey nei chiah lo mahse chhungkua 100 chuang zet an awm nia a hriat thu a sawi bawk. Kalkhawmte chu nasa zawk a tan la tura fuihin a theihna apiangah Department chuan a tanpui chhoh zel tur thu leh tun aia nasa zawk a Vety a mithiam te hmang tangkai turin a chah a ni.

Resource person – Dr. KVL Rochharzela, Sr.V.O. i/c A.I. in Pig (PIGFED) chuan Vawkpui hlawk zawk a vulh dan leh inthlahchhawn chungchangte, Vawk kahrai leh harsatna hrang hrang laka hmalak dan turte sawiin Training a pe a, zawhna leh chhanna hun te hman zui a ni a, kalkhawm ten hlawk thlak an ti hle.