927/2026-2027 

Kolasib, 10th June, 2026: Vawiin khan DC Conference Hall, Kolasib-ah Kolasib Bawrhsap leh District Programme Coordinator (VB-G RAM G) ni bawk, Pu H. Dolianbuaia kaihhruaiin ni 125 inhlawhna thar, Viksit Bharat - Guarantee for Rozgar and Ajeevika Mission (Gramin) - 'VB-G RAM G' chungchangah District Level Orientation Workshop neih a ni.

Thutkhawm kaihruaitu Pu H. Dolianbuaia chuan thu sawiin, Mizoram mipui za zela 70 te chu thingtlanga cheng kan nih thu a tarlang a. Sawrkar laipuiin thingtlang mipuite tana inhlawhna tur 'VB-G RAM G' a rawn duang chhuak hi a vanneihthlak hle a ni, a ti. "India ramin zalenna a hmuh atanga kum 100 a tlinna tur, kum 2047 hma ngeia ram changkang (developed nation) kan nih theih nan sawrkar laipuiin hma nasa takin a la mek a. Khawpui leh thingtlangah hmasawnna rualkhai tak kan neih theih nana scheme tha tak mai, khawvela scheme lian ber ni bawk 'VB-G RAM G' kan hmang tur hi a lawmawm takzet a ni," a ti.

DC chuan, he mission-in a tum ber leh a ruahmannate thingtlang mipuite hnena a taka a thlen theih nan, line department-te chu hrui khat vuana tangtlanga, theih chin chinah thawhho uar turin a chah a ni.

He hunah hian Pu Lalmuan puia, Project Director, DRDO Kolasib pawhin thu sawiin, lo awm tur July ni 1-a hman tan tur 'VB-G RAM G' chu ni 100 inhlawhna MGNREGS thlaktu tur a nih thu a sawi a. MGNREGS kalpui mek laia tlin lohna leh that tawk lohna awmte tha zawka siam that nana duan a nih thu a tarlang. Project Director chuan he hmalakna thar hi hlawhtling taka kalpui a nih theih nan theih tawp chhuahpui turin line department aiawh kalkhawmte chu a ngen a ni.

Vawiina Orientation Workshop-ah hian Pu Vanlalpeka, Assistant Project Officer (APO) chuan PowerPoint presentation hmangin VB-G RAM G chungchang kalhmang tur hi chipchiar takin a sawifiah a, hemi hnu hian zawhna leh chhanna hun tangkai tak hman zui nghal a ni. He hunah hian Kolasib District huam chhunga line department hrang hrang atangin officer-te an tel tha hle a ni.