926/2026-2027 

Saitual, the 10th June, 2026: Vawiin khan DC Conference Room, Saitualah Ministry of Health & Family Welfare hnuaia India ram pum huapa naupangte zinga kawthalo (diarrhoea) vanga thihna pumpelhna tura beihpui thlakna 'STOP Diarrhoea Campaign 2026' kalpui dan tur chungchangah Saitual District Coordination Committee an chairperson, District Bawrhsap ni bawk Pu Srinivas Sadi kaihhruaiin an thukhawm.

He hunah hian Dr. Zothanpari Chhakchhuak, Dy. CMO chuan powerpoint presentation hmangin STOP Diarrhoea Campaign chungchang a sawifiah a, a thil tum te, activity hrang hrang neih tur te leh line department mawhphurhna te a tarlang a ni.  

STOP Diarrhoea Campaign thupui chu “ORS leh faina leh thianghlimna hmangin kawthalo lakah inveng rawh”- “Prevent Diarrhoea-Take care with Hygiene and ORS” tih a ni. SDC hi June ni 16 atanga July ni 31, 2026  thleng kalpui tur a ni a, he campaign chhung hian naupang kum 5 hnuai lamte hnenah a thlawnin ORS leh Zinc tablet te sem a ni dawn a ni. ASHA leh healthworker te chu hmun hrang hrangah kalin kawthalo ven dan leh enkawl dan te, kut sil dan te, ORS leh zinc pawimawhna te, faina chungchang zirtirna te an pe ang. Sub centre-ah te leh Anganwadi Centre-ah te ORS-Zinc corner siam a ni ang a, heng hmunah te hian naupang kawthalote chuan enkawlna an dawng thei dawn a ni. 

Kumin STOP Diarrhoea Campaign hawnna (District Launching programme) hi June ni 16, 2026, chawhma dar 10:00 AM-ah Aganwadi Centre-VII, Saitualah neih tura ruahman a ni.