1732/2026-2027

Kolasib, 11th August, 2026: Vawiin khan DC Conference Hall, Kolasib-ah Kolasib Bawrhsap Pu H. Dolianbuaia kaihhruaiin Kolasib khawpui lun lai a awm, Venglai Bazar sak that dan tur ngaihtuahin thutkhawm pawimawh tak neih a ni.

Thutkhawmah hian Venglai Bazar thar sak a nih chhunga bazara inpho thinte luah lailawk  tur hmun chungchang te, an insawn chhuah hun tur te, insawn chhuahna hmuna faina chungchang ruahman dan tur leh a bula traffic kalhmang leh sumo stand awmsa siamrem dan turte uluk taka sawiho a ni.

He hunah hian thutkhawm Secretary, Pu Lalthangkima, District Commerce & Industries Officer (DCIO), Kolasib chuan Venglai Bazar dinhmun tlangpui report a pe a. Report-a a lan danin Venglai Bazar sak that hna hi Pi Laldinpuii, Aizawl hnenah pekniin, a sakna atan hian Rs. 3,79,81,603/- (Cheng vaibelchhe thum, nuai sawmsarih leh pakua, singriat sangkhat zaruk leh pathum) ruahman a ni.

Tun dinhmunah Bazar chhungah hian nitina thut hmun nghet nei (regular) chawhmeh zuar 26, sa zuar 3 leh thil dang zuar 3 an awm a. Heng bakah hian Inrinni zing bazar bikah chawhmeh, second-hand leh thil dang zuar, bazar kawtlai leh kawngpui dunga inpho thin mi 100 vel an awm bawk a, Inrinni bika sa sat thin mi 10 vel an awm bawk a ni. Venglai Bazar chhung (ground floor)-a leng lo leh regular lova inpho thinte hi bazar tual leh a chhehvel kawngpui dungah an inpho thin tih tarlan a ni.

Tun dinhmunah Venglai Market fee khawn hna hi Lalhmelthai, Venglai, Kolasib kutah April ni 1, 2026 atanga September ni 30, 2026 thleng Rs. 80,500/- in contract-a pek a ni a. Bawlhhlawh paih fai hna hi Pu F. Lalmuanpuia, Salem Veng, Kolasib hnenah April ni 1, 2026 atanga March ni 31, 2027 thleng atan Rs. 4,50,000/- in contract-a pek a ni bawk.

Thutkhawm chuan tun dinhmunah bazar thiah phalna (demolition order) hmuh a la nih rih loh avangin, thiah phalna hmuh a nih veleh khawtlang hruaitute leh sawrkar lam ten hmalak zui dan tur thukhawma sawiho leh nise an ti a ni.

Vawiin thutkhawmah hian Pu Lalrinpuia Varte,Superintendent of Police (SP), District Local Administration Officer (DLAO), District Urban Development Officer (DUDO), Settlement Officer (Revenue Dept.), Sr. SDO (PWD Project Sub-Division), DCIO bakah Joint Village Council President, Kolasib Venglai VC President leh YMA Venglai Branch President te an tel a ni.