595/2026-2027

Kolasib, 19th May, 2026: Vawiin chawhma atang khan Pi Vanlaldiki Sailo, Commissioner, Persons with Disabilities (PwD) chuan Kolasib khawpui huamchhunga sawrkar hmunhma hrang hrangte tlawhin, rualbanlote (vohbikte) tana awlsam zawka luh chhuah theihna (Access Audit) an siam dan te a hmunah a enfiah. Vawiin khan DC Office, District Hospital (Civil Hospital), Govt. Kolasib College, St. John's Higher Secondary School leh Home for the Blind School te a tlawh a ni.

Heng hmunhmate a enfiahnaah hian Commissioner Pi Vanlaldiki Sailo chuan, vohbikte chuan ngaihsak an mamawh bik thu a tarlang a. "Pianphunga rualbanloten pangngai taka nun an hman ve theih nan, a tulna apiangah kan tanpui a ngai hle a ni," a ti. Vawiina fuke kim tha tak te pawh hi nakinah chuan ramtuileilova la awm thei reng kan nih thu a sawi. Sawrkar laipui duh dan angin, sawrkar pisaah te, zirna inah te, Biak In leh vantlang mipui punkhawmna hmunah te rualbanlote (vohbikte) tana hman awlsam tur hmunhma kan buatsaih a tul hle a ni, a ti bawk.

Ram changkang apiangah vohbikte an ngaihsak zual thu tarlangin, Pi Vanlaldiki chuan an tana hamthatna awm thei ang angte hmuh chhuahsak a, an theihna te sawrkarin a chhawr tangkai thin thu a sawi a. Mizoramah pawh vohbikte tana luh chhuah leh hman nuam tur hmunhma (accessible environment) kan siamsak ngei chu a pawimawh hle a ni, a ti.

Mizoramah pawh Office of the Commissioner, Persons with Disabilities hmalaknain ni 21 February, 2025 atang khan 'Access Audit' hi neih tan a ni a. Vawiin May ni 19, 2026 hian Kolasib District hmun pawimawh tak tak - DC Office, District Hospital, Govt. Kolasib College, St. John’s Higher Secondary School leh The Salvation Army hnuaia Home for the Blind ah te endikna hi neih a ni. Mizoram chhungah district 9 ah he programme hi kalpui tawh niin, Mizoram pumpuiah endikna hi neih chhuah vek tum a ni.

Sawrkar laipui chuan India rama rualbanlote hamthatna tura a duan pakhat 'Accessible India Campaign' hnuaiah Access Audit hi a ngai pawimawh em em a. Rualbanloten khawi hmun pawh harsa lova an thlen ve theih nan - wheelchair hmangte, mitdelte leh a dangte tan, mipui punkhawmna vantlang building hrang hrang, Biak In, sawrkar pisa, zirna in leh a dangte chu siam rem ngei ngei tur tiin khauh takin thupek a siam a. Hemi bawhzui hian Audit Team te leh rualbanlo aiawhten heng hmunte hi endikin hun an hmang thin a, India ram pumpuiah Access Audit hi chak taka kalpui mek a ni.

Vawiina Access Audit neihnaah hian rualbanloten khawilai pawh awlsam taka an thlen theih nan wheelchair hman ngaihna hmunte, mitdelte tana braille tarna hmun siamte, mipui punkhawmna vantlang building hrang hranga an kalvelna tur te endik a ni a. Hmunhma buatsaih dan tur ruahmanna (drawing) hlan nghal a ni bawk. He Access Audit neihnaah hian Pi Lalrinchhani, SDC leh Nodal Officer (PwD) ni bawk te, Pi Lalnunpari Hmar, DPO Women & Child Development, Kolasib, PWD Building Division, District Project Coordinator (Samagra), Special Educator representative, DSW Office aiawh te leh DIPRO Office aiawhten an tawiawm a ni.